Сенатор угьаврий рязи бакъа

[dropcap]А[/dropcap]ьрасатнал кьатIаллил ишир­тталсса буллалисса министерствалул франциянал властирдан баян бунни Ниццалул аэропортрай сенатор Сулайман Каримов угьаврий цивппа рязи бакъа бушиву. Федерациялул Советрал мажлисрай кьатIаллил билаятирттал иширтталсса буллали­сса комитетрал хъунама Константин Косачевлул бувсунни, аьра­сатнал политик ва предприниматель дипломатнал паспортрал заллу ухьувкун, кьатIаллил билаятирттай мунахь зума цIухлансса ихтияр дакъашиву. Франциянал прокуратуралул вакилтурал баян бунни Каримов налогру къадуллай унутIий увгьушиву.

Нидерландиянал полициянавусса бусурман хъаннил ихтияр

[dropcap]У[/dropcap]ттиния тинмай Нидерландиянал полициялувусса бусурман хъаннихь хIижаб рутансса ихтияр дуссар. Укунсса хIукму бувну бур билаятрайсса инсаннал ихтиярду дуруччай комиссиялул. Голландиянал закондалийн бувну, полициянаву зузисса инсантурахь полициянал лаххия дакъа, цамур журалул лаххия лаххан ихтияр дакъасса дур къуллугърал бурж биттур буллалийни. Диндалул лишанну дусса затругу чурххай къабучIину дур. Утти дакъа­ссар дур му къадагъа. Роттердамраясса Сара Изат тIисса душнища бювхъуну бур полициянаву­сса бусурман хъаннил хIижаб ла­ххансса ихтияр дуруччин.

«Давла бувай» кIанттурду

[dropcap]Т[/dropcap]уркнал Президент Тайип Эрдоганнул Стамбуллай хьу­сса батIаврий баян бунни Магърибуллал билаятирттал мурад бушиву исламрал билаятирттавун энад бутансса, гъургъазартту дурну, кувннайн кув бивчуну, кIи-шан бищун бувансса. «Исламрал дуниял кIидухъансса сценарий бартдигьавриха чялишну зузисса гужру бур, Магърибуллал циняв бандитътал ва преступниктал исламрал билаятирттайн тIайла бувунни. Му бакъассагу, Магърибуллал билаятру, Сириянавусса дяъви багьана хьуну, авадан хьун ччай бур, къалмакъаллу ва питнарду миннан «давла бувай кIанттуну» хъанай бур», — тIий ур Турциянал хъунама.

ХIадур бувссар
П. Рамазановал