Чув аьш дуккан хъиннивав

Чув аьш дуккан хъиннивав

Интернетрал каширду ва бияла хъун хъанайссаксса, кказитирттан захIмат хъана­хъиссар информациялул гъунттуй яхьун. Билаятрайцири кказитирттайх дурксса кьини миллатралминнуйх къадурккун къадикIайссар. ХIакьину ноутбук, компьютер, смартфон ба­къасса къатта Лаккуйгума нажагьсса бухьунссар.

Гъинттул буттал шяравун, 1- мур ЦIувкIрав, лавгсса на дуссухалу буван ккурчIав бувкминнай тамаша бувну бивкIра: цаннахь ца нахIусса хаварду буслай щябикIайссия хьхьичI, утти циняв телефоннавун кьувтIуну бия. На ца сурат рирщуссия. КкурчIав щяивкIсса 12 инсаннаву ца бакI гьаз дурсса акъая, циняв телефоннавун бувххун бия. Гьаннайсса, информациялул хьхьури дакъассар хIакьину кказитирттахь. Циняв редакцияртту хIарачат буллай буссар утти­нин лавсун най бивкIсса ттугъ щяв багьан къабитан: кказитирттал электрон версияртту дуллай, сайтру буллай, социал сетирдай кказит буккултрал аьдад хъун дуллай. ЧIумулгу тIалавшиннар. Цамур куццуй пайда бакъассар.
Амма хъуни-хъунисса мегаполисирттайгума буссар кказит каруннил бувгьуну буккин ччисса агьлу. Типографиялул кьанкь нахIуссар. Вана утти хIукуматрангу бувчIуну печатьрал СМИ-рду аякьалийн лакъавсун чара бакъашиву. Аьрасатнал ПаччахIлугърал Думалул хъинчулий ккарккунни ОНФ-лул (Щалвагу Аьрасатнал Халкьуннал фондрал) печатьрал СМИ-рдансса финансру гьарза дуван аьркинссар тIисса тIалавшинна. 2018 шинал печатьрал СМИ-рдан 200 миллион арцул ххи буван ккаккан бунни бюджетрай. Уттинин 348 миллион личIи буван куссия, паччахIлугъраясса кумаг хIисаврай. Миннул ялун 200 ххи буварча, аьмну хъанай бур 500 миллион. Ми чIярусса арцу дакъар, амма, ОНФ-лул Централ штабрал сопредседатель Ольга Тимофеевал тIийкун, ми арцу регионнал редакциярттайн диярча, мискинсса редакциярттан кумаг къавхьуну къаличIанссар. Ва ялагу. Регионналми кказитирттал редакциярттал экономика лащинссар, цуксса хIарачат булларчагу рекламардаягу лябу­кку бакъассар. Кказит бищай ча­гъар, краска ххира хъана­хъиссар. Журналистътал командировкарттай къазанарча, кказитир­ттай аьнтсса, хайрсса макьалар­тту чан хъанахъиссар. Федерал бюджетрал кумаг бакъа цавагу редакциялуща сантирай зун къахьунтIиссар. КIанттул чиновниктал агьалинай аьтIий бухьурча, миллатирттал прессалийгу аьтIутIиссар. ПаччахIлугърал депутатътуран бувчIунуккар кказитирттал ва кказитирттай зузиминнал чIарав бацIан аьркиншиву.
Укунний жува ххаришиврул ча аьш дуккан хъиннивав тIун бикIару. Буниялттунгу, бавну лякъиннав бюджетрал хьхьуригу, мархьгу кIунттихьминнан журналистътуралмур чIугу.

ПатIимат Рамазанова

Читайте также: