[dropcap]М[/dropcap]ахIачкъалалив ноябрьданул 5-ннин циняв лахъ къатравун гъилишиву дулунтIиссар куну баян бувунни шагьрулул хасъсса къуллугъирттал. Ттинин шагьрулий гъилишиву садикирттавун, школардайн, азарханардайн дулавриха зий бивкIссар. Ноябрьданул 5-нния махъ гъилишиву къадуллусса къатрал заллухъруннахь дуссар ихтияр, Госжилинспекциялул «Горячая линиялийн» оьвкуну, къатри бявкъуну бушиврия баян бан.
З. АьбдурахIманова
«Агарда гъилишиву дуллуну махъ, халкьуннал къатравусса батареяртту бявкъунма бухьурча, къатрал заллухъруннал, чивчуну аьрза, бучIан бан аьркинссар хасъсса комиссия. Къатравусса гъилишиву, муниха зузисса, му дуллалисса къуллугъирттал биялдаралу дакъагу, халкьуннал биялдаралугу дуссар. Гьарнал батареяртту, бургъурду бакьин бувну, дякIинттул ми экьинанисса тагьарданувун къабагьан, цIанава домоуправлениялул зузалтрал ххал бувну, хIадурну бикIан аьркинссар», — чивчуну бур Госжилинспекциялул сайтрай.
КьатIув хъуннасса, асар хьунсса дяркъу дакъанугу, халкьуннал къатририв цIанава бявкъуну бур. ЧIявуми, кондиционерду, ттукIрал пачру лавхъун, цукуннугу ноябрьданул 5-сса кьини дучIаннин къатлувусса мюрщи-хъуни бявкъу-гъили къахьунмур буллай бур. Соцсетирдавугу халкьуннаясса: «Бякъил литIавай буру! Ахиргу тари гъилишиву дулунтIисса! КIи дучIаннинма, къашай хьунну, дару-дарманнахун багьну буру», — тIисса леххавуртту чансса дакъар.
ХIукуматрал кьамул дурсса низамрайн бувну, халкьуннан гъилишиву дулайссар 5 гьантлул мутталий къатравусса гьавалул тагьар 8 градусраяр лагьну духьурча.
Гьавалул тагьарданул дянивсса градусру хIисав дурну, кIинттул чIумал Аьрасатнаву яла гъилимур шагьру бусса бур Сочи. Шикку дянивну 14,2 градус дикIайсса дур. Хъирив Ялталий – 13,2 градус. Шамилчинмур кIанай бур жулла республикалул хъуншагьру. МахIачкъалалив гьавалул дянивсса тагьар 12, 3 градус дикIайсса дур. Хъирив Феодосия ва Анапа бур.
Гьавалул гъилишиврийн бувну жува хьхьичIминнавух бунугу, хъамабитан къабучIиссар жула кIану хъатру хъуннасса кIану бушивугу. Хъатру сававну, халкьгу къашавай, бявкъу-гъили хъанахъиссар.
Щукру жучIара ссут ва кIинтнил ца барзгу гъилисса шайсса. Акъарив закондалул кьамул бувсса 5 гьанттагу хIисав бувну, шагьрулул ЖКХ-лул тагьаргу хIисавравун ларсун, жуятува къатравува зурукъянтту хьунссия.
ЯхI банну ноябрьданул 5-нин.
