Къутаннайсса СПК-рдал давурттая

Хозяйстварттал каялувчитуращалсса гьарца батIавурттай райондалул бакIчи Юсуп МахIаммадовлул мудан эбратран ишай ГьунчIукьатIрал СПК-лул хъунама Чавтараев Сиражуттин. «Мархха-ххун къаливчIун, буцири ризкьилущал ферма ччурччуну, паччахIлугърая цукунчIавсса кумаг тIалав бан къавхьуну, цайнура цалла фермагу цIудуккан дурну, цила чIумал дагьайсса налогругу дуллай, цала хозяйствалул жяматран ва щалла райондалун маэшатран лябукку буну зузисса, райондалул гьарца ишираву чIарав ацIайсса каялувчи ур», — тIий.

Зулайхат Тахакьаева
Ххалал чIумал ххалазандарайн биярча бакъа, фермалийн биянсса сант ттинин къадирияйвача, утти, гиккун бивукун, навагу мукIру хьура Сиражуттиннуя райондалул бакIчинал дайсса цIарду ххаралунсса дакъашиву. Ферма мархлуцIакул цIудуккан даврицIун, совет заманнай куннасса низамгу дия гикку. Цала зузалтрал захIматран ва бигьалаган щаллу дурсса ххаллилсса шартIру дия: гъинтнил лухччая хIухчалт яттищал бучIаннин хIадур бувну бур къатри хIулувхIуну, сирду бувккун, пач бивхьуну. Бур гьарца шартIирдал дузалсса хIаммам. Дояркахъал нис дувайсса къа­тта бур кIяласса пар-пар тIисса кафельданул бавкьусса. Отоплениялий гьашиву къадурну, гъили дурну дур полгу. Бигьалагай къатлувун бувххукун, дакIнийн багьунни коммунистурал заманнайсса ЯтIул уголок. Кказитир­ттал подшивкарттал ва луттирдал чIюйрду. КФХ-лул зузи кьинирдая бусласисса стендру. Пар-пар тIий бур ппаллу, бярчру бакьайсса кIантту. ХIадур дурну дур ризкьилул кIи рутансса лазуни, корма.
КФХ «Терек» сакин дурну дур 2009 шинал.
Сиражуттиннул нину Аьишат дакIнийн бутлай бур, хозяйство ччаннай дацIансса му­ттавагу къавхьуну, гьарзат щиналу лирчIун, хъунмасса зарал бившиву. Муния махъгу мукьцIалунния ливчусса ризкьилущал цичIар къалирчIун ччур­ччунугу дур.
ЗузинацIун Аллагьнал кабакьайссар, хIарачатрачIа барачатгу буссар тIийкун, Сиражуттингу увккунни захIматшивурттава. Лакрал буссар цамургу учала «Шин шинал лагъри» тIисса. Ялун нанисса шинну Сиражуттиннун ва ванал каялувшиндаралу зузиминнан бала-апатIирттая бурувччусса лякъиннав!