Кариннул арс ХIажиев Кьурбан
Октябрь зурул ахирданий, оьрмулул 44-ку шинаву, кIул бакъасса апатIрал жуятува личIи унни ххишала бакъа инсаншиврул бутIа лавайну буллусса гьунчIукьатIиричу ХIажиев Кьурбан Кариннул арс.
Кьурбан увну ур 1973 шинал декабрь зурул 18-нний Бабаюртуллал райондалий Тамаза-тюбелий. Байбихьулул школа ГьунчIукьатIув къуртал бувну бур, 10 класс – Буйнакскалий. Муния махъ, зугу зий, заочнайну къуртал бувну бур политехнический институт.
1996-2006 шиннардий Кьурбан зий уссия Гергебиллал электросетирдай Лакрал участокрал контролерну. 2006-2010-ку шиннардий – Лакрал райондалул Гъумучиял электросетирдал Транспортрал инженерну, 2010-2016 шиннардий – Гъумучиял РЭС-рал хъунама мастерну. КIул бакъа балаллул жуятува личIи аннин зий уссия Гъумучиял РЭС-рал хъунама диспетчерну Дагъусттаннал электросетирдал компаниялий.
Кьурбан ия чIивинияцIакула захIмат буллай аьдатсса, цалла даву щилчIав аьй къаданну биттур дувайсса инсан, лавайсса даражалул пишакар. Цаманан хIалу дуван тачIав махъунай къашайва, ванал хIурмат жяматрачIа хъунмая. Зузисса кIанайгу Кьурбаннул бусрав, кьимат лавайсса бия.
Цибанссар, Аллагьу тааьланал чичру укунсса духьунссия.
Кьурбаннул нязаннивсса бивкIулул кьурчIишиву кIидачIлай, жижара буллай буру ванал ниттихь ПатIиматлухь, уссурваврахь, ссурваврахь, ссурахъаврахь, махъсса цинявппагу гъан-маччанахь. Ванан бакъасса оьрму уссурвавран, ссурвавран булуннав. Аллагьнал миннахьхьун ссавур дулуннав ва хъуннасса кьурчIишиву духIансса. Кьурбан алжаннул ххари аннав, гьав нурданул дуцIиннав.
ГьунчIукьатIрал,
КIямашрал, ХIинтIиял жямат
МахIаммадрасуллул арс
Къунжуев Ибрагьимхалил
Вай гьантрай Ххюлусматусса МахIаммадрасуллул арс Къунжуев Ибрагьимхалил дунияллия лавгун шин хъанахъиссар. Ноябрьданул 1-нний ванан 62 шин бартлагантIиссия.
Аьрщи лаллай, къюву лагь хъанай тIун бикIай, амма жу, лахьхьу-цархьхьу ивкIусса кунма, къювулийнма буру. Лялиян буван къахъанай буру ххирасса Ибрагьимхалиллул нязаннивсса бивкIу. Ибрагьимхалил ия буттал кIану дазу дакъа ххирасса, цуманан ци хъинбала буван хъинавав тIисса, жяматрал иширттавух чялишну хIала уххайсса зунтталчу. Му жул щалвагу кулпатрал чул бищай ттарцI ия, хъамаитан шайма акъая.
Аьпа баннав, алжаннул ххари уваннав!
ЩилчIав ужагъирттай кьурчIишивуртту ва оьзрурду къахьуннав! Жул щавуй ка дихьлай бивкIцириннахьхьун цIуллушиву дулуннав, зул буми чаннайн букканнав!
Кулпат ПатIимат,
арс Рамазан, душру Зарема, Аида, уссу Мусилла, ссурвал Жарият, ПатIимат, Ссакинат, Ххадижат, уссищар Светлана, арснал кулпат Камилла
МахIаммадлул арс Мусалавхъал Шамил
Октябрьданул 21-нний хар-хавар бакъасса бивкIулул ахиратравун лавсунни хъинсса дакI-аьмалданул, ххуйшиврул бутIа ххишалану буллусса инсан, аьчухсса дакIнил заллу, чIявучин ххирасса зунттал чув-адамина, кару мусилсса усттар, Мусалавхъал Шамил МахIаммадлул арс.
Шамил увссар 1947 шинал октябрьданул 22-ний Гъумук. 1967 шинал Гъумучиял дянивмур даражалул школагу къуртал бувну, дуклан увхссар Дагъусттаннал шяраваллил хозяйствалул институтравун, зоотехник шайсса факультетрайн. Миву дуклай унува, зий ивкIссар МахIачкъалалив СМУ-4-лий, яла, 1968 шиная шихунай, зий ивкIссар Гъумук шяраваллил хозяйствалул личIи-личIисса давурттай:
ДАССР-данул статуправлениялул райондалийсса инспекторну, шяраваллил хозяйствалул управлениялул зоотехникну, хъунама зоотехникну, племстанциялий селекционерну, районнал дянивсса предприятиялий зоотехникну, Заготскотрал Лакрал конторалул базалул хъунаману, Хьурттал совхозрал ряххилчинмур отделениялул управляющийну, Районорал ХЭК-рал зузалану. Ванал магьирсса каруннал цIу дурссар, цIуну дурссар чIявуссаннал къатри, дирхьуссар магъив, дурссар ичIаллил давуртту.
Мяърипатрай цала кулпатращал хъуни бувну, къатрал бунни 5 оьрчI.
Шамиллул бивкIулул къумашиву кIидачIлай, дакIнийхтунусса жижара буллай буру уссихь, кулпатрахь, ссурваврахь, оьрчI-душваврахь, махъсса цинявппагу мачча-ляхъиндалухь.
Цал хьхьичI алжаннул къапурду тIитIиннав, гьав нурданул дуцIиннав, ахират хъинсса хьуннав. Мунан къабуллусса оьрму оьрчIан булуннав!
Гъумучиял, Шаллал жямат
Камиллул арс Оьмаев Нураттин
Вай гьантрай жуятува личIи хьунни КIундиннал шяравасса ххаллилсса инсан Оьмаев Нураттин Камиллул арс.
Лавгунни Нураттин, олимпий чемпионтал хIадур буллай чIярусса шиннардий бивхьусса захIматгу бакIуйн къабувккунма. Цува вардиш буллай ивкIсса спортсментурал ххувшавурттая ххари хъанай, миннаха буттал куннасса аякьа дуллай ивкIсса тренернан цала пикри дузрайн буккан бувансса кьисмат къавхьунни.
Нураттин увну ур 1951 шинал июль зурул 26-нний Душанбай шагьрулий. Спортравусса цалчинсса хьхьичIуннайшивугу ларсун дур ванал Душанбайлий, хьуну ур Таджикисттаннал Республикалул халкьуннал чемпион.
1975 шинал ванан дуллуну дур СССР-данул Боксрал спортрал мастернал цIа. 2016 шинал Нураттиннун дуллуссар «Дагъусттаннал лайкь хьусса тренер» тIисса бусравсса цIа.
Нураттин Оьмаев чIярусса шиннардий зий уссия Умахановлул цIанийсса Олимпий резерврал спортрал школалий боксрал лавайсса категориялул тренерну.
Ва ия ляличIинува лакрал миллатрал жагьилтал ххирасса, ми хьхьичIунмай буллалисса инсан, хIакьсса патриот. Цува зузисса школалийгу ванайн учайва «лакрал тренер» куну.
ХIайп, лавгунни ххуйсса давурттайну, тIул-тIабиаьтрайну щалагу лакрал миллатран ххира хьусса Нураттин.
ДакIнийхтуну кьурчIишиву кIидачIлай, жижара буллай буру Нураттиннул кулпатрахь, ДР-лул лайкь хьусса артистка Загьидат Муслимовахь, арснахь, душваврахь, дустурахь ва щалагу агьлу-авладрахь.
Махъминнал оьрмурдай барачат бишиннав, Нураттин алжаннул ххари аннав, рухI паракьатний дишиннав.
КIундиннал жямат
Хъуннасса кьурчIишиву кIидачIлай, дакIнийхтунусса жижара буллай буру ниттихь ПатIиматлухь, уссурссуннахь, щалагу ГьунчIукьатIрал жяматрахь,
Кариннул арс ХIажиев Кьурбан
нязаннийсса бивкIулул жуятува личIи аврийн бувну.
Вил гьав нурданул дуцIиннав, Алжаннул ххари аннав. Вил чаннасса симан жул дакIурдива тачIав къагьантIиссар.
Гъумучиял райэлектросетирдал зузалт
Хъуннасса кьурчIишивугу кIидачIлай, жижара буллай буру МахIаммадлул арс Мусалаев Мусалавхь, ванал уссу
Шамил
жуятува личIи шаврийн бувну. Махънал оьрмурдай барачат бишиннав, Шамилгу алжаннул ххари аннав. Амин.
«Илчи» кказитрал зузалт
