[dropcap]Н[/dropcap]оябрьданул 7-нний Дагъусттаннал премьер-министр Аьбдуссамад ХIамидовлул дунни агьамсса масъалартту ххал бигьлагьисса батIаву. Ганий гьуртту хьунни ДР-лул БакIчинал ва ХIукуматрал Администрациялул Каялувчи Исмяил Апанниев, МахIачкъалаллал бакIчи Муса Мусаев, ДР-лул ХIукуматрал Председательнал хъиривчутал ва цаймигу.
Цалчин ххал бивгьунни инвалидтал давурттал щаллу баврил масъалартту. Вице-премьернал кIанайма Анатолий Карибовлул увкусса куццуй, махъсса кIира шинал мутталий му масъалалух хъуннасса къулагъас дуллай бур. «Му масъала бур Аьрасатнал Федерациялул ХIукуматрал даимансса контрольданий. ХIакьинусса кьини республикалий бур цинявппагу 321 азарунная ливчусса инвалидтал (51 азараксса – 1-мур группалулсса, 138 азараксса – 2-мур группалулсса, 88 азараксса – 3-мур группалулсса). Инвалидсса оьрчIру бур Дагъусттаннай 43 азараксса. Давурттай зун бюхъайсса инвалидтал бур 71%», — увкунни Анатолий Карибовлул.
Аьбдуссамад ХIамидовлул му масъалалул хIакъираву увкунни: «Жулва региондалий давурттах луглагими чIявусса бур. Яла гъансса чIумуву аьркинссар чулийн буккан буван инвалидтал давурттал щаллу баврил масъала».
БатIаврий ххал бивгьунни шагьрулул администрациялул контрольданийсса масъалартту: «Мюхчансса ва ххуйсса ххуллурду» тIисса программа дузрайн дуккан даву, «Къулайшивуртту дусса шагьрулул кIанттурду» тIисса программа бартдигьаву ва цаймигу.
БатIаврий мукунма ххал бивгьунни къатравун гъилишиву дучIан даврил масъалагу. Щалла республикалий зий дайдирхьуну дур гъилишиву щаллу даврил система. БатIаврий ялагу ххал бивгьунни ххуллурдай апатIру хъанахъаврил хIакъиравусса, АПК-рал давуртту бартлагаврил ва цаймигу масъалартту.
ХIадур бувссар
ХI. Аьдиловлул
