[dropcap]Н[/dropcap]оябрьданул 17-нний МахIачкъалалив хьунни «Италиянал хьунабакьлай бур Ккавкказ» («Италия встречает Кавказ») тIисса проектрал хIакъиравусса планерсса батIаву. Мунил лагрулий ххал бивгьунни Италиянал ва Дагъусттаннал дянив ишбажаранчишиврул, машлул ва экономикалул чулухасса хIала-гьурттушиндарал масъалартту.
ХI. Аьдилов
Дагъусттан Республикалул ккаккан дунни цила экономикалул каширду ва инвестициярттал чулухасса бюхъурду. Ва хьунабакьаврил мурад бур Италиянал ва СКФО-рал регионнал ишбажаранчитурал вакилтурал дянив машлул ва экономикалул арарду дузал даву ва ишбажаранчитурал дянив дахIавуртту дайдишаву.
Италиянал чулухату бия Италиянал Республикалул ЮФО-райсса ва СКФО-райсса генеральный почетный консул Пьерпало Лодиджани, Италиянал Республикалул вакилнал (посол) цалчинма маслихIатчи, АьФ-лийсса Италиянал вакилханалул машлул ва экономикалул бутIул бакIчи Никколо Фонтана, Италиянал ва Аьрасатнал Машлул ва промышленностьрал палаталул директор Витторио Торрелебини, личIи-личIисса кампаниярттал каялувчитал, Италиянал АПК-лул бутIувусса предприятиярттал директортал, гостиницарттал комплексрал, туризмалул, промышленностьрал предприятиярттал каялувчитал.
ДР-лул ХIукуматрал Председательнал хъиривчунал кIанайма – ДР-лул экономикалул министр Раюттин Юсуповлул бувсунни Дагъусттан хIадурну бушиву Италиянал уртакьтуращал хIала-гьурттуну зун электростанцияртту баврил ва шяраваллил хозяйствалул бутIраву. Докладраву Р. Юсуповлул бувсунни Италиянал хъамаллуран пикри бушиву Дагъусттаннай зун шяраваллил хозяйствалул, чIиви ГЭС-ру баврил, медициналул ва туризмалул аралуву. Дагъусттаннал вакилтурал бувсунни жулла республикалий цукунсса хьхьичIуннайшивуртту хьуну дуссарив шяраваллил хозяйствалул, строительствалул ва архитектуралул, туризмалул ва цаймигу арардаву.
БатIаврил ахирданий хьунни цаппара «ккуркки столлу», личIи-личIисса масъаларттал хIакъиравусса.
