Буржру чан баврил масъалартту ххал бивгьунни

[dropcap]Н[/dropcap]оябрьданул 15-нний Дагъусттаннал БакIчинал кIанайсса Владимир Васильевлул ва АьФ-лул Ухссавнил Ккавкказуллал иширттал министр Лев Кузнецовлул Дагъусттаннай дунни ТЭК-рал (топливно-энергетический комплекс) Ведомстварттал цачIусса зузи группалул батIаву.


Ххал бивгьунни республикалул муштаритурал ччувччусса газрахлусса багьа булаврил низам цIакь даврил, газирдал сетьру ца хъаттиралун ласаврил ва газрахлусса багьа ласаврил иширттавух республикалул ихтиярду дуруччай органну хIала-гьуртту баврил масъалартту.
Лев Кузнецовлул бувсунни зузи группа сакин бувну бушиву Дагъусттаннал ТЭК-рал давурттал мюнпат ва мюхчаншиву лахъ даврил цIаний цачIусса давуртту дачин даву мурадрай. Мунил давурттал хъунмур хIасил, ккаккия хъанахъиссар газрахсса багьа булаврил давуртту низамрайн дуцаву», — увкунни Лев Кузнецовлул.
Зузи группалул давурттал хIасиллал хIакъираву бувсунни ДР-лул ХIукуматрал председательнал кIанайманал хъиривчу Шамил Исяевлул.

Гара кьини Дагъусттаннал БакIчинал кIанайсса Владимир Васильев ва АьФ-лул Ухссавнил Ккавкказуллал ишир­­ттал министр Лев Кузнецов кIул хьунни МахIачкъалаллал хьхьирил машлул портрал давурттащал.
Портрал гендиректор Мурадхан Хидировлул бувсунни портрал давур­ттал хьхьичIсса захIматшивурттая ва ганил каширдая: «Ххуйсса гьава хьурча, портраща дянивну лавсун бюхълай бур тIайла дуккан 3 азардаксса тонна ханхъуслил. 2011-2014 шиннардий Иранная Дагъусттаннайн бучIан бувссар сайки миллион тонна цементрал», — увкунни ганал.
Владимир Васильевлул ва Лев Кузнецовлул ххал дунни портрай зузисса техника. Миннал бувсунни аьркинну бушиву му предприятиялул каширду ххал диргьуну, давуртту гьарзану дуллансса чаранну лякъин.