[dropcap]К[/dropcap]ъабардин-Балкьарнавунсса аьрххилиясса асардал видурцIусса хьунни ттул ларгсса нюжмар. Мудан хияллай бикIайссияв чIявучин ххира хьусса ХьхьинякI бярдайн, Чегем жюружанттайн биянсса, Къабардин-Балкьарнал тIабиаьт, зунттурду ккаккансса. ЦIан-чаннаву М. ХIажиевлул кучалийсса РАН ДНЦ-лул идаралул хьхьичI батIин икьрал дурсса жу, ца 20-яксса инсан, хъинну ххуйсса, рахIатсса микроавтобусрай бувкру ссапарданий.

---

Залму АьбдурахIманова

ЧIаххуврачIансса аьрххи

[dropcap]Т[/dropcap]иягу, шиягу базардал къума бувсса, цIинцI-ччюрклил бувцIусса Хасавюртуллал ххуллурду кьабивтун, Чачаннал дазу лахъайхту, ххуллурдува бия уттасса, бювчIусса. Чачунгу – ухру кIяла киражрай хIулурхIусса мурхьру, марцIшиву, цIусса ламурду. Паракьатшиву ва аслахIшиву дия Чачаннал аьрщарай. Хъуруннай ттунна ттинин телевизорданувух дакъа къаккарксса уттизаманнул тракторду, сеялкарду щуруй бия. Бакъая, жучIава кунма, ххуллуцIва цана ччинал ччикун бувсса ттучанну, машинарттал «мойкарду», ду-дунийн къялмахру, тIавтIсса ккалусру бивчусса техстанцияртту.
Ахиргу бивунав Къабардин-Балкьарнал аьрщарайн. Нальчик­райн бияннинма ХьхьинякI бярдайн кIура баяйсса шанбачIулий хьунабакьин жущал икьрал дур­сса тиччавасса гид, Ольга тIисса хъамитайпа, ялугьлай бия жух. БярдачIан най буна, ванил бувсуна Къабардин-Балкьарнал тарихрая, тIабиаьтрая, зунттая, халкьуннал вирттаврая. Дугьайсса хъу-лухччинул къааваданнугу, вайннал аьрщи дия гьивчул ба­гъирдал буллугъсса. Ольгал бусаврийну, республикалул маэшатраву хъунма­сса кIану бугьлай бу­сса бия накIлил, дикIул продукциялул. Гьивчул мурхьру бия инсаннал ка диянуксса лахъшиврул. Багъру интту тIутIавун бахьлавгсса чIумал, микIиращалсса чявгъа гъараллал гъагъари къабан, ялтту къер­тту лакьайсса журалий бувсса бия. Жула базаллаву, супермаркетир­ттаву 60-70-лла къурушрансса «кабардинкалул» ца ккило тийх дия 25-30 къурушран.
Ахиргу, хъун ххуллия кIура бавну, ца ссятуксса манзилгу бивтун, бивру ХьхьинякI бярдайн. ЧIявусса туристътал бия гай гьант­рай гикку. ТIабиаьтрал ккаккиялун ккаллийсса ХьхьинякI бярнил лагма каферду, ппалул ххаллая щаршсса янна-ус, варсул усру, чIанну, къуттакьяпри, арцул чIюллушиннарду, варсив бахлахисса тIивтIу ттучанну бия. Щалла дара шашликIру шахьлахьисса тIаннул пуркIурал кьункьал ларсун най дия. Бярнил зуманийх, туристътал лагайсса ххуллурдацIух къабардин-балкьарнал нахIу-нацIушивуртту, ппалул ххаллая дурсса муму-тамурду дахлахи­сса хъами-душру бавцIуну бия. Дия шикку Ккавкказуллал «брендран» хIисавсса чурчхела, натIухI, щирбит, ахъул­ссаннуя дурсса нацIушивуртту. Кафердаву яла хьхьичIххуттай чирчумур дукра «хичины» дия. Вай бия, жула кунмасса, нувщи ва уртту хIалану, нисирая ва марцIну нисирая був­сса буркив. Амма «хичины» вайннал дукайсса дия, помидорду ва кьурчIи мамаш хIуен бувну, хьхьюмусса соусращал. Кафердаву­сса дукра-къюссул сияхIравух бия даралувусса неххардия бувгьусса къизил-балугъругу.
ТIабиаьтрал гьайкалсса Хьхьи­някI бярду сакин хьуну бу­сса бия 5 (карстовый) бярния. Нальчик­райн шичча 30 км. ххуллул ду­сса дия. ВайннучIан нани ххуллий хьунадаркьуна Черек тIисса мадара гьалаксса зунттал нехгу. Бярнил щинал марцIшиврул, лицIаврил зумардайх 5-7 метралул манзилданий чIанулу мурхьирдал мархри, чIапIив чIалай бия. Ялун буруган бяр бия щинал щюллишиврул някI бишлашисса. Балкьар мазрай ванийн учайсса бия Церик-Кель куну, мукъул мяъна «цух увкусса щин» дусса дия. Бярнил яла куртIнийгу 279 м. дусса дия. Гьавалул тагьарданух, ссавруннал дарщу-даччаврих бурувгун, щинал ранг даххана шайсса караматсса бяр бия. Щинаву сероводород гьарзасса бухьувкун, бярнил чIаравсса кьанкьра дия ца аьжаивсса. Къабардиннал халкьуннал ца бусалалийн бувну, бяр хIасул хьуну бусса бия агьали тархъан бан, гайннахлу увксса виричунащалсса талатавриву бивкIусса аждагьа багьсса кIанай. Ва ацIвахъул бусалардавасса ца бия.
Махъунмай нани ххуллий жу бивру аьрщарава нанисса гъили­сса щинал бувцIусса хIавз бусса турбазалийнгу. Шивун буххан 100 къуруш ласлай бия гьарная. Гьавалул тагьар 12-13 градус гъилишиврул диркIнугу, дарув-дармансса гъили щинаву тIуркIу тIисса оьрчIал, гьузузисса халкьуннал хIат-хIисав дакъая. Яла жу ссапар бавхIуссия Нальчикрайн, хьхьу рутан икьрал дурсса «Ахъулссаннул алжан» тIисса патирдануву.

Нальчик, вил ххуйшиву ция?

[dropcap]К[/dropcap]ъабардин-Балкьарнал хъуншагьругу дякI мяш къахьун­сса бакъая. Халкьуннан занан­сса гьарта-гьарзасса тротуарду бу­сса шагьрулий дакI мяш къархьуну бикIанссияв МахIачкъалалия бувкIсса жу?
Лахъ къатрал, идарарттал ва хъун ххуллурдал дя-дяних дия ча-чунгу тиягу-шиягу мурхьру бувгьусса газонну, тротуарду. Ххуллул ва идарарттал дя-дяних ацIраксса метралул манзиллу бия. Республикалул ХIукуматрал къатрал хьхьичIсса майдан гьар чулуха тIивтIусса, хьхьичIух машинартту, жяматран­сса транспорт лагайсса бия. Шагьрулий яхъанай усса ия 300-400 азараксса инсан. Шагьрулул гьану бивзун бусса бия 1727 шинал. Респуб­ликалул хъун шагьру хIисаврай, ванил тарих най бусса бия 1921 шиная шинмай.

Караматсса Чегемнал жюружантту

[dropcap]М[/dropcap]у хьхьуну патирдануву бигьагулавгун, кIюрххил ссят 10-нний жу бавчуру Чегемнал жюружантту ккаккан. Нальчикрая шиккун нанисса ххуллу бия лагьсса зунттавух, бакIурдайх бивхьу­сса. Архния ца караматну чIалай бия къутта кьяправусса жагьилтураха лащан бан лайкьсса кIяла мар­ххалттанивун лавгсса Хъун Ккав­кказуллал зунттурду. Чегемнал жюружанттайнсса ххуллий цалчин хьунадаркьуна къабардиннал шяравалу. Духми къатрай ттун хIисав хьуна чIавахьултту чансса ва бавщу­сса чIиртту бушиву. Къабардиннал хъунмур никирал къатри дувай­сса диркIун дур «ттул къатта, ттул чIалъаь» тIисса зумуну. Къатри дия чарттая, ятIул калпуширттая дурсса. Къабардиннал хъуннасса къулагъас дувайсса дия азварданух: накьичру, чIярусса чIюлушиннарду дакъасса, цивппагу ляличIисса, ттинин ттунма къаккавксса, лухIисса, ятIулсса муххай, арцул рангирал муххал парч­ри бусса бия.
Хъирив хьунадаркьусса балкьарналмур шяравалу дия цамур журалий дурсса. Вайннал къатрах, азвардах хъуннасса къулагъас дакъашиву чIалай бия. ХъунмурчIин вай ризкьилуха, аьрщараха зузисса халкь бушиву чIалай бия. ЧIалачIиссаксса, жула кунма, ца ххалабакIувун ххулув лакьайсса аьдат дакъая вайннал. Гьарнал хъюрдаву ряхра-арулла ххалал бижакь дия.
Чегемнал жюружанттайгу ба­къасса журалул халкь, машинартту бакъая. Шиккугу балкьарнал касмучитурал каруннил дурсса затирдал базар бия. Жюружантту дия кьинилул мутталий кIира ссятрай бакъа баргъ къабацIайсса къуманиву. ХIазран бакъая халкьуннаву вайннуйн «АьтIутIисса жюружантту» учайсса: зунтту аьтIисса хханссия. Гьарца жюружани чар­ттава нанисса дия. Бусала бия жюружантту нанисса зунттул вив нех экьинай дуссар тIиссагу. Гиккугу туристътал бизар хьунсса иш бакъая. Цавай миллатирттал дукрардал ссуп­рардах бия, цавай дучрай, ттукрай сайрду буллалисса бия, цавай маша-ташурду буллалисса бия.
КIинттул чIумал, щалла дара микIиравун ларгсса чIумалгу, жюружантту экьинайнна дикIайсса дия.
«КIинтнил магьа ккаккан» кIилий чIявусса туристътал бучIай­ссар шиккун», — бувсуна, дахху-ласу дуллай буна, гиккура ппалул ххаллая жуларду щашла­шисса Сания тIисса къабардин-хъамитайпалул.
ЦIунилгу гьавияв Къабардин-Балкьарнал аьрщарайн, цIунилгу мюрш бивкIун хъирив багьавияв тайннал касмурдах, багьу-бизулух, тарихрах. Цалсса ва аьрххилиясса асарду балгланна!