АьФ-лул ФС-рал ПаччахI­лугърал Думалул КIулшиву дулаврил ва элмулул комитетрал выездной совещаниялул гьур­ттучитал вай гьантрай бивунни У. Муртазааьлиевал цIанийсса Республикалул социал-захIматрал адаптациялул ва профориентациялул центрданийн.

Бадрижамал Аьлиева
Му центрданийнсса аьрххилий ДР-лул кIулшиву дулаврил ва элмулул министрнал хъиривчу Т. Халиловлул хъамаллурахь бувсунни укун, кIулшиву дулай­сса, ляличIисса центр билаятрал кIулшиву дулаврил системалуву цамур бакъашиву. Темирхан Халиловлул мукунма бувсунни ва аькьлу-кIулшилул нукьсаншиву дусса оьрчIансса инновациялул журалул идара бушиву, шикку бикIайкунсса оьрчIащал архIал кIулшивуртту ласлай бушиву цIуллу-сагъшиврул ссуссукьусса оьрчIругу. Хъамаллурахь ялагу бувсунни центрданул аьрщарай бушиву инклюзив журалул оьрчIал багъ, байбихьулул школа, 8-мур журалул (аькьлу-кIулшилул чулухасса итххяххавриву ссуссукьушивуртту дусса оьрчIру) школа-интернат ва профучилище.
Центрдания хъамал лавгунни оьрчIал дуккаврин, творчествалун, итххяххаврин чара бакъа аьркинсса шартIру щаллу дурну душиву цалва яруннин ккавккун.