[dropcap]Н[/dropcap]оябрьданул 13-нний Дагъусттаннал БакIчинал кIанайма Владимир Васильев хьунаавкьунни жулла республикалийн увкIсса Аьрасатнал Федерациялийсса Непал паччахIлугърал вакил Раши Рам Гхимирещал.

[dropcap]Х[/dropcap]ьунабакьаврий гьуртту хьунни АьФ-лул ПаччахIлугърал Думалул депутатътал ХIажимет Ссапараьлиев ва Аьбдулмажид МахIрамов, ДР-лул БакIчинал ва ХIукуматрал Администрациялул Каялувчи Владимир Иванов ва цаймигу.
Рашил барча кунни Владимир Васильевлухь цIусса къуллугърай итаву ва бувсунни цува Дагъусттаннайн учIаврил мурадраяту: «Непаллал ва Дагъусттаннал аьмсса чIявусса бур, географиялул хасшивурттал чулухатугу, миллатирттал чулухатугу. Жу лядуккан дуллай буру зунттал туризм ва жун ччай бур му ххуллий зущал хIала-гьурттуну зун. Мунияр ххишалагу, Непаллай хъинну хIадур байссар МЧС-рал сянаткартал. ЖучIа бур 105 этногруппа ва 125 мазрай гъалгъа тIутIисса инсантал. Ттун кIулли Да­гъусттаннайгу чIявусса миллатру бушиву ва миллатирттал министерство душиву. Жу мунил каялувчинащалгу хьунабавкьуру. Умуд бур миллатирттал арардал дянив­сса иширттавугу хIала-гьурттуну зун», — увкунни Рашил.
«На дакI дарцIуну ура Непаллай бушиву чIявусса дакI хъинсса ва цачIу зун гъира бусса инсантал. Мукунмасса инсантал жучIагур бусса. Жугу жулва чулухату хIадурну буру хIала-гьурттуну зун, жул инсантал Непаллайн бивну, хIала-гьурттуну зий байбивхьуну бур. Жу му хъиндайдихьу ттинияр шихуннайгу лахъи лаган дуванну туризмалулгу, культуралулгу, миллатирттал арардал дянивгу хьусса опыт кувннащал кувннал баххана буллай», — увкунни ДР-лул БакIчинал кIанайманал.
Хьунабакьаврий мукунма гьуртту хьунни альпинист ва ишбажаранчи, Непаллащалсса Аьрасатнал Уртакьшиврул ва дусшиврул попечительшиврул совет­рал член, «Инвестиционный Союз» КБ-рал Директортурал советрал председатель Евгений Козорезов, мукунма 2017 шинал Эверестрайн лавхъсса Кирилл Моляев ва Рашид ХIажиясулов.

ХIадур бувссар ХI. Аьдиловлул