[dropcap]В[/dropcap]ай гьантрай МахIачкъалалив «Дусшиврул къатраву» хьунни лакрал машгьурсса балайчи Улзана Макьсудовал концерт.

А. Оьмариева
[dropcap]В[/dropcap]а хъанай дур ванил цилалу хьхьичIра-хьхьичI дуллали­сса концерт. Жунма, тамашачитуран, ялун бигьану чIаларчагу, цикссагу захIмат бишин багьай творчествалул ххуллий балайчитуран. Шиная шинайн балайрдал магьиршивугу ларай хъанай, цила гъирагу, шавкьгу дакIниву ядурну, лакрал жяматрал хьхьичIун бувккуна Улзана.
Зал халкьуннал бувцIуну кка­­ккайхту, бувчIлай бия Улзанал балайрдал муштаритал ва чIарав бацIан хIадурми чансса бакъашиву.
«Магьузар» тIисса лакрал халкьуннал макьандалийсса балайлийну тIиртIуна концерт.
«Ттул дакIниву балайлухсса гъира чIаванияцIа хIасул хьуна, сахIналийн буккансса хиялгу мудангу бикIайва», — тIий, буслай бия Улзана.
Улзана Макьсудовал тIутIисса балайрдал репертуар дия гьарза-гьартасса: эшкьи-ччавриха, тIабиаьтраха, буттал кIанттуха ва хъярчийсса.
Уттизаманнул технологиярттай чIюлу бувсса сахIналий, хъункIултIутIи кунма, исвагьину бавкьуну бия цуппа балайчигу.
Улзанал чIарав бацIан бувкI­цири балайчитурайнугу чIалай бия ванил кьадру-кьимат. Миннавухсса ца хъанай бия, «Мусил чIунил» заллу, Израилнал халкьуннал цIанин лайкь хьу­сса машгьурсса артистка ва балайчи Хава Долес. Долеслул караматсса чIуний щаллу бувна бюххансса балайрду, бувсуна ччянияцIасса дусшиву душиву Улзанащал, кIицI лавгуна ванил пагьму-гьунарданул ххуйшиву ва инсаншиврул чулуха хьхьичIун личаву.
Залдануву гъан-маччанал дянив щядиркIун дия Улзанал ххирасса нинугу. «Ниттиха» тIисса, залдануву щябивкIцири нитти­хъангу, цила ниттингу хас бувну увкусса балайлул хъирив бувсуна Улзанал хъунмасса бияла ва кабакьаву душиву ниттил цилла дуллалисса гьарцагу давриву.
Концертрай гьуртту хьуна мукунма лакрал машгьурсса балайчитал: Марианна, Зоя Гудова, Залихха, Саният Рамазанова, Рашид Багъатаев, Аьбдул Мурадов, Аьли Абакаров ва м.ц. БувкIун бия концертрай гьуртту хьун цайми миллатиртталми балайчиталгу: Ш. Ханакаев, А. Айсаева, Л. СалихIова, Г. ХIажиева м.ц.. Шамил Ханакаевлущал архIал Улзанал увкусса хъярчийсса балай тIурча, ляличIину ххуй бивзуна тамашачитуран.
Цума-цагу балайчинансса яла лараймур бахшиш – му тамашачитал цаява рязину личIаву дур, гайннал дакIру ххари давур. Ттул пикрилий, Улзанаща ххину-ххишалану бювхъунни тамашачитал рязи буван, ххаришиврул халкьуннал дакIру дуцIин дуван.
ТIайлабацIу баннав вин, Улзанай, магьирлугърал ххуллий!