[dropcap]В[/dropcap]ай гьантрай Цалчинмур каналданий, гьунарду бусса оьрчIаятусса машгьурсса «Лучше всех!» телепередачалий Максин ГалкиннучIа, Дагъусттаннал циркирал студия «Пагьламан» ккаккайхту, дакIру пахрулул асардал дуцIин дуллай дия. Студиялий каялувшиву дуллалисса Асхабаьли ХIасановлул, Дагъусттаннал культуралул лайкь хьусса зузалал, оьрчIру хъинну ххуйну хIадур бувну бия.

ПатIимат Рамазанова
А. ХIасановлул цува каялувшиву дуллалисса кIивагу коллективравату яла гьунар буми личIи бувну, ччарча кувннал ялув кув бавцIусса, ччарчагу ккурттай пагьламан лахълахъисса гьунарду ккаккан буван бувна оьрчIру. Цивппагу миллат­рал лаххиялуву авурну чIалай бия МахIаммад, Жавгьарат, Мариям, Сафият ва Сабрина. Залданувумигу тамаша бувну бия.
«Пагьламан» студия хIасул бувссия «Ссурулккуртта» тIисса Эстетикалул тарбия дулаврил центрданул гьанулий. Му студиялий 1-мур ЦIувкIратусса Максим Рамазанов, аьпа биву, каялувшиву дуллай уссия. ЦIанакул мунийгу, магьирлугърал оьрчIал №4 школалул «Дагъусттаннал барзулт» коллективрайгу каялувшиву дуллай ур Асхабаьли, ми коллективрдаватуссая централ телевидениялийсса гьунар бусса чIава пагьламанталгу.
Съемкарду дурну мукьах гьунар бусса чIава пагьламантурайн оьвкуну бур Аьрасатнал Президентнал Дагъусттаннал постпредствалул хъуниминналгу. Постпреднал къуллугъ чIумуйну биттур буллалисса Изумруд МухIуттиновал, Дагъусттаннал ляличIисса магьирлугъ машгьур дуллалисса оьрчIахь ва миннал наставниктурахь барчаллагьгу увкуну, дакIний личIансса бахшишру дуллуну дур.
Вай гьантрай соцсетирдай чIава пагьламантурал гьунардая хIайранну чичлай бур агьали.
МахIаммад Аьбдулхабиров: «ХIайранну ура! Барчаллагь оьр­чIан, тренертуран ва нитти-буттахъан! Зу зувагу, Дагъусттангу бюхттул бувссар хIакьину! Вара кьини ккаккан бунни телевидениялий ИГИЛ-данул амрулийн бувну Дагъусттаннай ва Москавлив терактру дуван най бивкIсса да­гъусттаннал преступникталгу. Вана укун личIи-личIисса буру жува: ххаллилсса ва, цуксса кьурчIинугу, къаххуйссагу».
Аллай Аьбдуллаев: «Музыкалун кIанттай, зюннав ва дачIу диркIссания, хъиннува ххуйну бикIанссия».
МахIаммад Бадруттинов: Ттул, чувнал, иттавгума ххаришиврул макь гьуххи хьуна.
Маржанат Дугъуниева: «Къа­ххуймуния бусан анавар буккай СМИ-дай, агар му къаххуймур ккавкказ агьулдануцIун бавхIусса бухьурча, октябрьданул 15-ннийрив Дагъусттаннал сивсусса вирттаврая бия ихтилат. Та шоулий уттинингу дагъусттан оьрчI гьуртту хьуна, му чIава спортсменналгу циняв хIайран бувна. Укун гьунарду бу­сса, итххявхсса оьрчIру бусса респуб­ликалул бучIантIимур чара бакъа ххуйсса бикIан аьркинссар!
Расул Мажидов: «Дагъус­ттаннал цIа гьаз дуллан аьркинсса укунсса давурттайнур!».
Телеведущий Максим Галкиннул оьрчIахь увкунни: «На Да­гъусттанная пахрулий ура! Дагъус­ттан зуяту пахрулий буссар!». Мяйжансса махърур!