[dropcap]О[/dropcap]ктябрь зурул 3-нний Да­гъусттаннал аьрали комиссариатрай хьунни ссуттилсса оьвчаврил хIакъиравусса ДР-лул аьрали комиссар Дайтбег Мустапаевлул пресс-конференция.

А. Аьбдуллаева
[dropcap]А[/dropcap]ьрали комиссарнал бувсунни ссуттилсса оьвчаврий Да­гъусттанная аьралуннаву къуллугъ буллан тIайла буккантIишиву 1000-ннийн бив­сса жагьилтал. Ларгсса шинал вара чIумал гьан бувну бивкIун бур 1680 инсан.
Оьвкуну аьралуннавун буцлацими шиная шинайн чан хъанантIий бур, ца Дагъусттаннай бакъассагу, щалагу Аьрасатнаву. 2016 шинал ссуттилсса призыврай аьралуннаву къуллугъ бан увцуну ивкIун ур 152 азара жагьил, гьашину буцлай бур 134 азара. Призыврай буцлацими чан хъанай бур утти аьралуннавун чIявуми контрактрал гьанулий буцлай тIий.
Военкомнал бусласимунийн бувну гьашину аьралуннаву къуллугъ буллалиминнал 70% контрактниктал бур.
Дагъусттанная цалчинсса призывниктал тIайла буккан тIий бур октябрь зурул 20-нний.
— Кьиблалул аьрали округрал штабрал тIалав бунни ссуттил­сса оьвчаврий Дагъусттанная 770 инсан гьан ан. Бюхъайссар 300-ннийн бивсса жагьилтал ялун тIалав бан.
Гьай-гьай, аьралуннаву къуллугъ бан ччими цикссагу ххишаласса бур. ЦIанасса чIумал республикалий аьралуннавун гьан бан бучIисса жагьилтал 60 азарунная ливчусса бур.
Къуллугъ бан гьан ччиминнава язи бугьантIиссар ларайсса ва дянивсса хасъсса кIулшивуртту ларсъсса ва оьрмулул хъунисса жагьилтал, — тIий ур Дайтбег Мустапаев. Ванал бусласимунийн бувну, призывной пунктрай аьралуннавун тIайла буклакисса жагьилтурахьхьун дулун тIий дур хасъсса янна ва дуки-хIачIия, мукунна саллатIнал харж бачин бансса банкрал карта ва цанна-цаннасса электрон картарду.
Ссуттил аьралуннавун бувцуминнава 170 инсан тIайла уккан тIий бур Национал гвардиялувун, 600 – личIи-личIисса аьрали частирдавун. Дагъусттаннаясса аьра­литал къуллугъ буллантIий бур цинярдагу аьрали округирттай, личIи-личIисса журалул аьра­луннаву.
Военкомнал мукунма бувсунни гьашину Минобороналул дуккаврил идарарттайн бу­хханми язи бувгьушиву, 295 инсан ми идарарттал курсантътал хьушиву.
Гьашину военкоматрайн мукунсса 19 чагъар бувкIун бур. Аьрзирайми чагъарду тIурча, чансса бур. Арула дагъусттанчунал хIакъираву сукку дурну дур уголовный деларду.
Шиккува кIицI бан, ссуттил­сса оьвчаву нан тIий дур декабрь зурул 31-ннийн бияннин.