ДР-лул Строительствалул, архитектуралул ва ЖКХ-лул министерствалий бувсъсса куццуй, республика щаллуну хIадур хьунтIиссар ноябрьданул 1-нний къатравун гъилишиву дулайсса чIун хьуннин. ЦIанасса ппурттуву (октябрьданул байбихьулий) ЖКХ-лул объектру 2017-2018 шинал кIинтнил чIумуйн хIадур хьуну дур 94,6 процентрал.

ХIасан Аьдилов
[dropcap]Ш[/dropcap]агьрурдай ва районнай ялун нанисса кIинтнийн хIадур дурну дур 4 млн. квадрат метрарду тIювалул фондрал (пландалий ккаккан бувминнул 80%), 427 котелни, 20 дязаннул гъилишиву дулайсса кIанттурду. Дакьин дурну дур 580 километра гъилишиврул, 12,7 азарда километра щинаххуллурдал, 1,7 азарда километра канализациярттал ва 4,3 азарда километра электричествалул сетирдал.
Миннуяр ххишалагу, хIадур дурну дур 13,5 млн. къурушир­ттансса материаллал ва техникалул луртанну ЖКХ-лул объектирдай балики авария хьурча, ми духлаган даву мурадрай. Ххуллурду марцI баншиврул хIадур бувну бур 212 хасъсса машина. ХIадур бувну бур диспетчертурал ва авариялул къуллугъру. Дагъусттаннай къат­ри гъили байсса чIун дайдишай­ссар ноябрьданул 1-нния махъ. Му чIумалгу гьарца муниципалитетрал цалла ккаккан дайссар къатравун гъилишиву дулаврил чIун. Мукун­сса чIумун ккалли дайссар, агарда 5 гьантлий гьавалул температура 8 градусраяр чансса дикIарча.