ДиркIун дур ссуттихуннайсса чIун. Акул-Аьли, циван лавгун ивкIссарив, лавгун ивкIун ур ЧIарахъун, яний Закаталлайн. Тиккусса цала хъамаличунал звардануву, гьивхьхьул мурхьирал ххютулу халичагу бувтун,кьяпагу чулинмай бивхьуну, Акул-Аьли чяй хIачIлай ивкIун ур. Мукун кайпрай унува, мунал янилун багьну бур азвардануву хьусса, ттуккул бакIру кунма, хъунисса къавахъру.
Миннухгу урувгун, цала чIаравсса гьивхьхьул мурхьирахгу урувгун, Акул-Аьлил цахьва цала увкуну бур:
— Дунияллул хIикматшиву ххал да, ваксса хъунмасса мурхьирай кIаксса мюрщисса гьивхь шайсса, таксса чIирисса къавахърал къяртлуй таксса хъунисса къавахъру шайсса?
Мукун тIий унува, мурхьирал лахънияту Акул-Аьлил бакIрайн ца щюллисса ккирттаращалсса, дикъарсса гьивхь дагьну, ттамп куну кьабакIравун щуну, ккунук ххяххан бувну бур.
Микку Акул-Аьлил чайва тIар:
— Дунияллун цинма кIулну бивкIун бур чув ци ххяххан дан аьркинссарив. Щукру гьивхьхьул мурхьирай ттуккул бакIруксса къавахъру къашайсса бивкIсса! – куну.
