[dropcap]Л[/dropcap]аргсса бигьалагай кьини, октябрьданул 8-нний, МахIач­къалаллал бакIчи Муса Мусаев шагьрулул кучардай, ххуллурдай федерал программалул лагрулий дуллалисса давурттал ялтту увккун ур. 

ХьхьичIва-хьхьичI ва ивну ур «Единая Россия» ВВП программалул лагрулий бакьин буллисса «50-летия Октября» паркравун.
Парк бакьин буллай сукку хьу­ссар ва шинал майрай кьамул був­сса хIукмулийну. Ва чIумул му­тталий шикку даххана дурну дур щях даркьусса плитка, кьаркьсса къяртрацIа марцI бувну, цIу бувну бур мурхьру, къатIри, мукунма бакьин бувну бур Шамиллул цIанийсса кучалия паркравун нанисса агьаммур ххуллу.
Паркраву нанисса давурттаха зузиминнал бусаврийну, цIу бувну, бакьин бантIий бусса бур «Борцам за власть Советов» тIисса монументрал ялалу, халкь буххай ххуллуцI чанирду бивхьуну, хьхьунил чIумалсса паркрал чIалачIин ххуй дантIий бусса бур, бугьантIий бусса бур личIи-личIисса журалул мурхьру, тIутIив. Ва бакъасса, паркраву чан бантIий бур дахху-ласу дуллалисса мюрщи ттучанну. Шагьрулул бакIчинал амру бувну бур, паркраву бивкIсса ба­ссейн ва фонтангу дакьин дурну, вайннуцIун цIусса, чанирду лахълахъисса ва лешлашисса, уттизаманнул фонтан дуван.
Хъирив М. Мусаев ивну ур ххуллу бакьин буллай, асфальт бакьлакьисса А. Исмяиловлул цIанийсса (нукIувасса Энгельслул) кучалийн. Халкь давур­ттайн ягу ахттакьунмай шаппа-шаппайн нанисса чIумал Шамиллул цIанийсса кучалий «пробкарду» буни, МахIачкъалаллал шупIиртурал язи бугьаймур ххуллу ва бухьувкун, яла асфальт тIавтIмур кучагу ва бивкIссар. ЦIана тIурча, 2 метралул ххуллу гьартагу бувну (ца-ца кIанттурдай 4 метралулгу), хъунтIулливгу дуцIин дурну, асфальтрал цалчинмур къат даркьуну дур. КIира ва дачIи километ­ра манзилданул дусса ва ххуллийх 4 000 тонна асфальтрал дакьинтIий ва ххуллурдал зумардай 3720 бордюрданул чару бишинтIий бу­сса бур.
Муса Мусаевлул, щалва кучалул тагьар ххал дурну, цала чулуха ца­ппарасса амрурду бувну бур ччясса мутталий биттур бан тIалав буллалисса. Мукунна бакIчинал ххал дурну дур К-М. Агасиевлул цIанийсса кучалий дуллалисса давуртту, Шамиллул цIанийсса «Аптечный дом» ва «Венеция» шадлугъирттал залданул дянивсса ттучаннал заллухъруннал цала харж-хуржирай бувсса сквер. Мукуна ивну ур вава кучалийсса №42-44 къатрал хьхьичIсса хIаятирттавунгу. Ши­кку халкьуннал тавакъюрайну най дусса дур хIаятру лази-лакьи дуллалисса давуртту. Буллай бусса бур оьрчIансса майдан, бугьантIий бур мурхьру ва асфаль бутIин най бур халкь занансса ххуллурдайх.
Ахирданийгу Муса Мусаевлул ххал бувну бур ци тагьарданий бурив уттигъанну тIивтIусса «Усттартурал шагьру» тIисса цIанилусса сквер.
Шагьрулул кучардавухсса аьр­ххилия махъ бакIчинал цала каялувшиврулусса къуллугъирттая тIалав бувну бур, ччясса мутталий вай давуртту щаллу дурну, хIукуматрал программа бакIуйн дуккан дансса лажин кIялашиву дан.
ХIадур бувссар
З. АьбдурахIмановал