[dropcap]О[/dropcap]ктябрь зурул 13-нний МахIачкъалалив ДР-лул Миллатрал политикалул министерствалий хьунни Дагъусттаннал медициналул идарарттайсса диялдакъашивурттал ва ми дукьан дансса чаран лякъаврил хIакъиравусса «ккуркки стол». Шикку гьуртту хьунни «Народный фронт «За Россию» тIисса Аьрасатнал жяматийсса суккушиндарал региондалул отделениялул, ДР-лул ЦIуллу-сагъшиву дуруччаврил, ЗахIматрал ва социал иширттал министерстварттал, Роспотребнадзорданул, Росздравнадзорданул, МахIачкъалаллал ва Каспийскаллал администрациярттал вакилтал.

Андриана Аьбдуллаева
«Ккуркки столданул» даву тIитIлай, ихтилат бунни Щалагу Аьра­сатнал халкьуннал фронт (ОНФ) «Народная оценка качества» тIисса проектрал каялувчи Виктор Рожковлул.
— Жунма цинявннан кIулссар 1914 шиная байбивхьуну жула билаятрай зий дайдирхьушиву социал сфералул идарарттал даврин тIайласса кьимат бищаврил система. Мунил мурадгу социал сфералул идарарттал даврил даража гьаз бавур. Ва даврил ялув бацIан Президентнал тапшур бунни Щалагу Аьрасатнал халкьуннал фронтрайн. ОНФ «Народная оценка качества» проектрал лагрулий халкьуннал фронтрал активистурал ххал був­ссар билаятрал личIи-личIисса регионнайсса 1000-нния ливчусса поликлиникартту. Региондалул отделениялул активистуращал жу дарду рейдру цаппара МахIачкъалаллал ва Каспийскаллал медициналул идарарттайгу, хъунмурчIин пациентътурая аьрзри бувкIсса поликлиникарттай. Мяйжаннугу, ши­кку хьунадаркьунни чIярусса диялда­къашивуртту, хIачIайсса щин да­къашиврия тIайла хьуну, хIакиннайн оьвчайсса кнопкарттайн бияннин, — бувсунни Виктор Рожковлул.
Каспийск шагьрулул полик­линика дух хьусса къатраву бур, чIирттай дакъар штукатурка, ца­ппарасса кIанттурдай дагьну дур магъи. Поликлиникалувун буххай­сса кIанттурдай дирхьусса пандус ккаккан дур­сса тIалавшиннардай дурсса да­къар.
Электрон журалий хIа­кинна­чIан чичайсса система зий да­къар, къашайшалт, кIюрххицIунмай бувкIун, кабинетирттал хьхьичI бавцIуну, дугьлай бур очередь.
Диялдакъашивуртту хьунадаркьунни МахIачкъалаллал №3 поликлиникалийгу. Поликлиникалувун буххайсса кIанттурдайсса ва фойелувусса хIакиннайн оьвчай­сса кнопкартту зий бакъар. Мюрщисса оьрчIан ва нитти-буттан къума-цIансса жанахIраву ссяттурдий бацIан багьлай бур оьттул анализ дулун. Кьамул буллай бур дахьва ца кабинетраву. Пациентътал аьрзирдай бур талонну диялсса къадикIайшиврия.
— Диялдакъашивурттая тIу­тIийни, идарарттал хъуними аьрзирдай бур кадрарду ва ресурсру чанну бушиврия. Кабинетирттал хьхьичIсса хъунисса очередьру мунияту дакъарча, поликлиникарттал даву иш-тагьар кIулну дирхьуну дакъашиврул дур. Хъунама хIакиннаща, ца гьантлул дянив бакъахьурча, ца нюжмардул дянив щаллу бан шайсса масъала бур ва, – тIий ур В. Рожков.
Мукунна къулайсса шартIру дузал дурну дакъар МахIач­къалаливсса 4-мур хъаннил консультациялий. Идаралул бухкIуллул хьхьичI ца пандус дур, мугу тIалавшиннардайн бувну дурсса дакъар. ЖанахIирттаву ччаннахун бахчилай бивхьуну бур бургъурду. Электрон очередрай бацIайсса терминал зий дур, амма мунил талонну дуллай дакъар.
Пациенткахъал бусласаврийн бувну, миннан ирглий бацIан багьайсса бур ссят, кIира ссят ва дачIиннуй. Так хIакиннал кьамул бувну махъ най бур ми регистратуралийн. КIилчин бучIаннин миннахьхьун дуллай бур талонну, амма хIакинначIан багьан бухкIуллийхсса ирглий бацIан багьлай бур.
«За доступную среду» мониторинграл хIасиллая бувсунни щалагу Аьрасатнал Халкьуннал фронтрал региондалул штабрал сопредседатель, ОНФ «Народная оценка качества» приоритет проектрал координатор Татьяна Россохинал. Мониторинг дурсса идарарттавун багьну бур МахIачкъалаллал, Избербашуллал, Каспийскаллал, Къизлардал, мукунма Лаващиял, Гъумучиял, Ахъушиял медициналул идарар­тту. МахIачкъалалив ххал бувну бур №6, №4, №9-мур поликлиникар­тту, №1, №2, №3 оьрчIал поликлиникартту. Ми хIасиллугу дакI ххари дансса дакъар, агьалинан къулай­сса шартIру дузал дан итадаркьусса арцу аьркиннийн ишла дурну да­къар. Август-сентябрь зурдардий ххалбигьавуртту дурну, ккаккан дурсса диялдакъашивуртту чIяруми уттигу дукьан дурну дакъар.
Къизлардал поликлиника туберкулезный диспансерданул чIарав бур. Му цукунчIав бучIину бакъар. Поликлиникалий зий дакъар элект­рон очередь.
Каспийскаллал поликлиникалий кIиссурава оь ласайсса кабинет ца зуманив бур, туннулува оь ласаймур – тамур зуманив. Пациентътуран, ца кIаная ца кIанайн лечлай, очередру дугьлан багьлай бур.
Ххал бувсса сайки циняв поликлиникарттай зий дакъар электрон очерду.
Ахъушиял райондалий баш­ттанна духсса, лекьавайсса, цукунчIавсса шартIру дакъа­сса къатраву кьамул буллай бур пациентътал. КIия-шама зузала ца кабинетраву щяивкIун ур, микку кьамул буллай бур хъамигу, чиваркIгу, дакъар ми­кку цукунчIавсса пардав. Магъуя кIукI най дур.
Виктор Рожковлул ва Татьяна Россохинал бувсмунил хIакъираву цала-цала пикрирду бувсунни ши­кку гьур­тту хьун бувкIсса ДР-лул ЦIуллу-сагъшиву дуруччаврил министерствалул хъунмур эксперт Рита Мурачуевал, ДР-лул Роспотребнадзорданул хъунмур Элеонора Оьмариевал, Да­гъусттаннал педуниверситетрал дефектологиялул факультет­рал декан ПатIимат Оьмаровал ва м.ц. Вайннал бусласимунийн бувну, кIицI ларгсса диялдакъашивурттаву чIяруми идарарттал хъуниминнайн, хIакинтурайн хъар хъана­хъисса дакъар. Махъсса 10 шинал дянив агьали биялну гьарза хьуну бур, му чIумул дянив тIурча, цавагу цIусса поликлиника бувну бакъар. Биялну бакъар кадрарду, къулай­сса шартIру дузал дан диял­сса арцу итадакьлай бакъар.