Дагъусттаннал 4 предприятие ккалли дунни Аьрасатнал Кьиблалий яла хьхьичIунну зузиминнун

Сентябрьданул 21-22-нний Ставрополлай хьуссар 3-мур Дунияллул халкьуннал инвестициярттал форум «Агро Юг – 2017». Микку Дагъусттаннал 4 предприятие дагьан дурну дур СКФО-рай ва ЮФО-рай яла хьхьичIунну зузисса 16-ннивун, миннун дуллуну дур цан лайкьсса наградарттугу.
ХIасан Аьдилов
Форумрай гьуртту хьуну дур 800-нния лирчусса компанияртту, Ухссавнил Ккавкказуллал ва Кьиб­лалул федерал округирттал регионнал вакилтал. Дагъусттаннал делегациялул бакIчину ивкIссар Минсельхозпродрал каялувчи Каримхан Аьппасов.
Гьашину форумрай хIукму хьуну бур давриву ххуйсса хIасиллу хьун дурсса шяраваллил хозяйствалул предприятияртту личIи дурну, миннун лайкьсса кьиматгу бищун. МуницIун даркьуну дур АьФ-лул ХIукуматгу. ХьхьичIунну зузисса хозяйствартту личIи дурну дур 8 номинациялийну. Хъинну зузиминнун ккалли хьуну дур Къизлардал райондалул «Сириус» ООО тIисса предприятие, «Урицкий комбинат» ООО. Му предприятие ккалли хьуну дур «Устойчивый рост» тIисса номинациялий яла хъинну зузимурну. ХьхьичIунминнувух дур мукунна Къизлардал райондалул «Нива» ООО ва Къарабудах­ккантуллал райондалул «Гурбуки» тIисса хъудугьул-фермернал хозяйство. Ми кIирагу хозяйство ккалли хьуну дур СКФО-рай ва ЮФО-рай яла хъинми проектруну. Дагъус­ттаннал Шяраваллил хозяйствалул министерствалул бусаврийн бувну, ми предприятияртту чялишну зий дур «Лябукку бусса АПК» тIисса приоритетсса проект дузрайн ду­ккан даврил ххуллий.
Шиккува бусан, хьхьичIунсса кIанттурду бувгьуну бур мукунма Ставрополлал улклул, Ингушнал, Къабардин-Балкарнал, Къарачай-Чаргаснал, Ростовуллал улклул, Адигайнал, Къалмукьнал шяраваллил хозяйствалул предприятияртталгу.