[dropcap]С[/dropcap]ентябрьданул 29-нний ххисса пишакаршиврул кIулшиву дулаврил идаралун ккаллийсса МЦПК-лий (Махачкалинский центр повышения квалификации) хьунни «Дагъусттаннал кIулшиву дулаврил аралуву, элмулуву ва культуралуву оьруснал учительтурал бивхьусса бутIа » тIисса цIанилусса «ккуркки стол».

Бадрижамал Аьлиева
[dropcap]М[/dropcap]у бачин бувну ия МЦПК-лул советрал председательнал хъиривчу, политикалул элмурдал кандидат Эдуард Эмиров.
Гьарцагу дагъусттанчунан кIулли оьруснал интеллигенциялул, яла-яла учительтурал, цуксса хъунмасса кIану бувгьуссарив Дагъусттаннай махъа нанисса ник тарбия давриву, цивппа аьдатсса кIанттурдугу, цивппа вардишсса, тIааьнсса тIювардугу кьадиртун, кIул бакъасса, кьянкьасса зунттал законну ва тIабиаьтрал шартIру ду­сса чулданийн бувкIун. Ва кьини­сса ихтилатругу хас бувну бия цалва оьр­мурду зунттал оьрчIаща тархъанну Пушкиннул, Лермонтовлул, Толстойл чивчумур буккин шаврин хас бувсса оьрус учительтуран.
Ихтилатру бунни МЦПК-лул советрал председатель, профессор МахIаммад Абакаровлул, «Хъаннил содружество » ДОО-лул каялувчи, Дагъусттаннайсса оьруснал учительтураясса луттирдал автор ПатIимат Геличовал, МЦПК-лул директор Галина Исмяиловал, ДР-лул Музыкантътурал союзрал председатель Хан Башировлул, РАН ДНЦ-рал Геотермиялул ма­съаларттал институтрал элмийсса секретарь Саэд Ниналаловлул ва мукунма цайминнал.
КIилчин бувккун бур ПатIимат Геличовал « Оьрус учительтал » тIисса лу. Ванил барчаллагь увкунни ва даву дуллалийни цила чIарав бавцIуминнахь. Авторнал бувсунни мукунмасса лу­ттирду оьруснал хIакинтураягу, цайми пишакартураягу чичин дакIний бушиву.