[dropcap]У[/dropcap]тигъанну Оьруснал театрдануву хьунни Аьрасатнал ва Да­гъусттаннал халкьуннал артистка Бурлият Ибрагьимовал 85 шинал юбилейрал мажлис.

Бадрижамал Аьлиева
[dropcap]Х[/dropcap]алкьуннан ххирасса артистка барча буван ва кьини залданувун бувкIун бия ДР-лул культуралул министр Зарема Буттаева ва цаймигу къуллугъчитал, республикалул культуралул ва искусствалул зузалт, артисткал дустал ва гъан-маччами.

Бурлият Ибрагьимова барча буллалисса махъ лахълай, Зарема Буттаевал чIа увкунни ванин цIакьсса цIуллушиву. Дурккунни республикалул каялувшиннарал чулухасса барча бавугу.
СахIналийсса шиннардил мутталий артисткал ларсъсса чIярусса наградарттал ялун ва хьхьуну ххи хьуна ца ялагу – «Буттал аьрщарахсса ччаврихлу» тIисса Да­гъусттан Республикалул хIурматрал лишан.
ЦIа дурксса балайчинал юбилейрал мажлисрай махъру мукунма лавхъуна «Дагестан» ГТРК-лул директор Луиза Аьлихановал, Дагъусттаннал Театрдал ишкка­ккултрал союзрал председатель Айгум Айгумовлул, Буйнакскаллал райондалул бакIчи Камил Изиевлул, ДНЦ РАН-далул Мазрал, литературалул ва искусствалул институтрал искусствардал тарихрал отделданул хъунмур Эльмира Аьбдуллаевал, Санкт-Петербургуллал университетрал профессор, Аьрасатнал ОьрчIал чичултрал союзрал председатель Вера Львовал.
Гихуннай Къумукьнал театрданул артистътурал ва республикалул цIа дурксса коллективирттал кка­ккан дунни хъуннасса концертрал программа.
Ца-кIива махъ Бурлият Ибрагьимовал оьрмулия. Бувну бур ва 1932 шинал Буйнакскаллал райондалий Жунгутайлив. Оьрмулул 6 шинава байбивхьуну, Москавлив концертирттащал лагайсса бивкIун бур Дагъусттаннал паччахIлугърал балайлул ва къавтIаврил ансамбльданущал. Иосиф Сталиннул ванин ссятгума пишкаш дурну диркIун дур. Зий бивкIун бур Дагъусттаннал ссихьрал театрдануву, Къумукьнал театрдануву, ДАССР-данул Гостелерадиолий, микку зузиссаксса хIаллай Аьрасатнал ва Дагъусттаннал телерадиофондрай кьадиртун дур ттуршунния лирчу­сса записру.