[dropcap]Ж[/dropcap]ува, оьрчIшиврул шинну дакIнийн дичлачийни, чара бакъа дакIнийн бутару цалчин кьалан канил бугьан, лу-тетрадьрай хатI бишин лахьхьин бувсса, жунма кIилчинсса нинухъруну хьусса цалчинсса учительтал.
Октябрьданул 5-нний билаятрай кIицI лагайсса Учительтурал кьинилул хьунийн 50-хъайсса шиннардий ЦIуссалакрал райондалийсса ЦIуссалакрал школалий зий хъунмасса захIмат бивхьу­сса Щайхаьлиева Халисат МахIмудлул душ барчагу буллай, бусан ччай бур чан-кьансса ванил къабигьасса, амма лайкьну бувтсса оьрмулул ххуллия.

Залму АьбдурахIманова
Бувну бур Халисат Ккуллал райондалий диркIсса Бярнихиял шяраву. Бярнихиял жямат, чIярусса лакрал мюрщи щархъавух, ЦIуссалакрал райондалийн бизан бувсса чIумал, ванин дурарагу 5 шин диркIун дур. Чапаевкалий школагу къуртал бувну, Халисат дуклан бувххун бур Хасавюртуллал педучилищалувун. Ххуйсса кьиматирттай мугу къуртал бувну, зана хьуну бур цуппа дуклай бивкIсса Чапаевкаллал школалийн, байбихьулул классирттал оьрчIахь дарс дихьлан. ТтурчIиял шяравасса Щайхаьлиев Икрам Оьмарил арснан щар хьуния гихунмаймур ванил захIматрал ххуллу бавхIуну бур ЦIуссалакрал школалуцIун ва шиккусса жяматрацIун. Икрам, щарнил жяматрал дянив акъа, щаллагу райондалий хъинну сий-хIурматрайсса адамина ивкIун ур. Хъинну цаннацIун ца бавкьуну, цаннал ца хIурмат буну яхъанахъисса лас-щар бивкIун бур вай. Вайннал кулпатраву хьуну бур кIия арс ва кIива душ. Икрамлул ва Халисатлул оьрчIал ва оьрчIал оьрчIал язи бувгьуну бур бусравсса медициналул зузалал пиша ва зий бур Аьрасатнал личIи-личIисса шагьрурдай.
Мюрщисса оьрчIалссагу бувну, ласнал хъамалгу лавхъун, шяраваллил кIанттул кушурдугу бувну, Халисат МахIмудовнал цичIава дуклакисса мюрщултрах дан аьркинмур къулагъасгу чан хьун къаритайсса диркIун дур.
ВаничIа дуклай бивкIсса оьрчI-душру, хъунигу хьуну, хIакьину личIи-личIисса арардаву ххуй-ххуйсса пишардаха зузисса, гьарца хьунабавкьутари, Халисат МахIмудовна дакIнийн бутлай, ванил хIурмат буну бур. ХIакьинусса кьинигу цала цалчинсса учительницайн барчаллагьрай бур.
Халисат МахIмудовнал 53 шинай учительну зий, тарбия дурну дур цимирагу жагьилсса ник. Лайкь хьуну бур чIярусса грамотарттан, хIурматрал лишаннан ва «Дагъусттаннал лайкь хьусса учительнал» цIанин.
Цила оьрмулуву агьамсса кIану бувгьусса учительница барча буллай, щалагу классрал чулуха Халисат МахIмудовнан цIуллушиву чIа тIий бур МахIачкъалаллал №37 школа-гимназиялий байбихьулул кла­ссирттахь дарс дихьлахьисса ­Изажа Рамазанова. Учительнал пиша язи бугьансса эбратнугу ванин хьуну бур учительница Халисат МахIмудовна.