[dropcap]М[/dropcap]оскавуллал ХIукуматрал Миллатирттал иширтталсса буллалисса советрал сипталийну, СССР-данувун багьлагьи­сса билаятирттай бартдигьлай бур «ОьрчIру Дакьаврил суратру дихьлай ягу буруччара жу нацизмрая ва дунияллул терроризмрая» ва «Терроризм — цивилизациялунсса нигьачIиннар» тIисса дунияллул халкьуннал дянивсса проектру. Миннуву Да­гъусттангу гьуртту хьунтIиссар.

Республикалул БакIчи Рамазан АьбдуллатIиповлул тапшур бунни Донбассраясса оьрчIал суратирттал выставкартту Да­гъусттаннайгу дуван, миннул­сса бувангу тапшур бунни Да­гъусттаннал КIулшиву дулаврил ва элмулул министерствалийн. Проектру хIасул хьуну дур Донбассрал агьалинан гуманитар кумаг буллалисса волонтертурал хIарачатрайну. Дяъви яруннин ккавксса, ккаши-мякь бухIан багьсса, дяъвилул щавщи бив­сса оьрчIал суратирттава жунма аьлтта чIалантIиссар дяъвилул оьхIалсса сиккагу, мунил биян бувсса зараллугу. ОьрчIал суратру датIлай бу­ссар аьралий ишру най бивкIсса гьарца регионнай: Донецкалий, Луганскалий, АьсатIиннаву, Абхазнаву, Чачаннаву, Дагъусттаннай. Проектраву гьуртту хьунтIиссар мукунма Сириянавасса, Ливиянавасса, Сербиянавасса, Авгъанисттаннавасса, Босниянава­сса чIава художникталгу. Проект­рал гьанумур мурадгу – дунияллул агьалинайн, общественностьрайн планеталийсса геноцид дацIан дуван оьвчавур, терроризмалун ва нацистътурал идеологиялун ххуллу кьукьавур. Мунияту жу оьвтIий буру, оьрчIал суратру датIаврил марафондалий гьуртту хьияра, выставкартту дуван кумаг бувара тIий. «Жу гьарцагу журалул кумаг барчаллагьрай кьамул буванну», — тIий ур ва проектрал сиптачи ва хъунама, Гуманитар ва социал иширтталсса буллалисса Аьрасатнал департаментрал хъунама Александр Борисов (8 928 965 77 76). Проектраха зузими дакI дарцIуну бур, агьали фашизмалия ва терроризмалия буруччара тIисса оьрчIал леххаву дяъвилул къавгъардал ва питнардал цIу ягин дуван савав хьуминнан баян аьркинтIишиврий, оьрчIалмур чIунил ва леххаврил бияла личIисса бикIантIишиврий. Шиккува, хIалу дагьнура, учин, дяъви ккавксса ЦIуссалакрал школардайсса дуклаки оьрчIругу ва проектравух гьуртту хьун­ссар тIисса умудрай, школардал дирекциярттахь ва учительтурах ькъулагъас дувара тIий буру. Щаллагу дунияллул лагрулийсса проектирдаву гьуртту шаврийну, духхирча дакъа, зарал бакъар­хха. Сурат дишаврил гьунар бу­сса оьрчIругу школардай биял­сса бухьувкун.
Лакку оьрчIалми суратру рищунну «ЧIимучIалттуйгу». Ялугьланну зул суратирттах. Баян бувара щаллагу дунияллун зула дакьаврил чIу!

П. Рамазанова