Аьлил арс ХIанапиев МахIад
Вай гьантрай мукьцIал лахълахъиссар оьрмулул 60 шинаву яхI-къириятрал заллу, хъиншиврул бутIа буллусса уздансса лаккучу, Аьлил арс ХIанапиев МахIад жуятува лавгун.
Увну ур МахIад декабрьданул 8-ний 1956-ку шинал ЧIяйннал шяраву, оьрмулухунсса колхозник Аьлил ва Мисидул кулпатраву.
ЧIяйннал дянивмур даражалул школалий 8 классгу къуртал бувну, МахIад щала цанма кьисмат бувсса оьрмулий зий уссия Виричу ЦIаххуй Маккаевлул цIанийсса колхозраву, ризкьи, ятту ябуллай, Лаккуй ва къутаннай. Колхозрал маэшат абад буллай, МахIаммадлул цIа даимангу хьхьичIххуттай дуссия, зувирахъул шиннардий. Махъсса шиннардий, цалла цIуллушивруцIун бавхIуну, школалий зий уссия.
Цала оьрмулул дус, ссурхIиридуш Ххадижатлущал хъунигу бувну, дуккингу бувну, щаллу бувна 3 душ ва 2 оьрчI. Дазу-зума дакъа ххирая МахIаммадлун цала душварал ва арснал кулпатру.
Хар-хавар бакъасса къашайшиву сававну чIун дакъасса бивкIулул МахIад жуява личIи увунни.
ДакIнийхтунусса жижарагу буллай, ххирасса лас, аьзизсса ппу яла лагаврил кьурчIишиву кIидачIлай буру кулпатрахь Ххадижатлухь, душваврахь Маринахь, Мадинахь, Саратлухь, арсурваврахь Мурадлухь ва Мухтардухь, куявтурахь, махъминнахь цинявннахьвагу. МахIадлун къабуллусса оьрму махъминнан булуннав, гьав нурданул дуцIиннав, алжаннул ххари аннав. Амин!
ЧIяйннал ва СсурхIиял
жяматру
ДакIния къабуккара
Ларгунни шин, жул аьзизсса нину, цила щала оьрму оьрчIру тарбия баврин ва миннан кIулшивуртту дулаврин хас бувсса ххаллилсса педагог Ххадижат Оьмаева аьпалул хьуну.
ДакIнил кьамул буллай бакъар ва жущала бакъассар, ванил чаннасса симан утти ххал къахьунтIиссар учин.
ТачIав инсаннан къаччан бикIан къабувсса, дакI-аьмал хъинсса жул нину хIурматрай дия Бархъаллал шяраву. Дазу-зума дакъа ххирая дакIниймур бусан шайсса учитель дуклаки оьрчIангу. КIулссия миннан ххирасса учительницахь бувсмур кьатIув къабуккантIишиву, мунил дакI цIий маслихIат бантIишиву. Ванийн учайссия «оьрчIал дакIурдил духтур» куну. КIула жул ниттин ужагърай нахIушиву, рахIатшиву дуруччингу.
Жу, мукьва оьрчI, ниттил, ххуйсса тарбиягу дуллуну, ларайсса кIулшивурттугу ласун бувну, цала-цала оьрмулул ххуллийн бивчунав. Жул нину дия кару мусилсса усттаргу. Цила дарсирдацIун тIахIунтту дайсса кружокгу дачин дурну бикIайссия. Лайкь хьуссар цикссагу наградарттан.
Нину дия ккашилнал лякьагу, мякьнал кьакьаригу кIулсса инсан, гъанчунал чул бищай кIану.
ЗахIматну бия аьзизсса кулпат чIарав бакъа жул буттан Шамиллунгу, захIматну бия жунгу. ДакIнийхтунусса барчаллагь, жул кьурчIишиву кIидачIлай, жул чIарав бавцIусса Бархъаллал жяматран, школалул учительтуран, цинявппа гъан-маччанан. Зул кулпатирттаву ххаришивуртту чIяру даннав, цинявппа зула-зула мурадирттайн бияннав!
Шамил, Оьмар, ТIагьират, Сулайман, Аьлил
