Августрал 8-нний ахттайн бизаннинма гьавалул тагьар 32-33 градус каккан дуркун , «Августрал 8-9 нний бургъия, кIиришиврия мюхчанну бикIира» тIисса МЧС-рал баян баву нахIакьдансса къадиркIшиву мяълум хьуна. Хьхьурайгума му кьинисса кIиришиву 26-27 градусрал яларай дагьну дакъая. Хъиривмур кьинирив хьуна, аьрщарайн цIарал пирпилу багьарча, парх куну, цIу лачIун кунна хIадурсса. Ссят 12 къархьусса чIумал ххютулу 39 градус ккаккан дуллай дия.

З.АьбдурахIманова
Ахттакьун чIумал цIарал лама хьу­сса кIиришиврун кIанай, ххиттул ттугълищалсса марч гьаз хьуну, ахирзамана бивзун нанисса кинораву кунма, шагьру букъавчIай хьуна. Гьаваллаву гьанай дия халкьуннал экьилирчусса цIинцI-ччюрк, пакетру, чагъарду. Лешлан бивкIуна ттукIру, светофорду. КIичIирттаву мурхьру кьатI шаврищал , цаппара кIанттурдай ттукIрал тталлу багьну, зия хьуна интернет связь. Шагьрулул тагьар хъиннура оьлуркъуна, чявхъа гъаралданул щин канализациялул турбардавух къалаглай, кIичIиртту гьузи лавхъукун.
Оькки бала яла лавгун, цахъи гъарал, марч хьхьара хьуну, интернет зун диркIукун, социал сетирдава бувчIуна зараллу мяйжаннугу шагьрулун бакъа, халкьуннангу хъунисса хьушиву. Цумурдив ца кIичIираву цаннал машина кку­ччу бувну бия ттукIрал ттала багьну. Ца кIанай мурхьру мархлуцIакула бувккун, хъунмасса талихI хьуну бия инсантурайн къабагьаву.
Мура хьхьуну МахIачкъалаллал администрациялий бакIчинал хъиривчу Запир Алхасовлул каялувшиндаралу анаварсса батIаву хьуну дия. ХIукму хьуна кьатI хьусса мурхьру, къяртри, кIюрххилнин къариртун, ххуку дурну, ттукIрал тталлу ххуллурдая бувкьун, кIичIиртту бавхьуну низам дуллай байбишинсса. ЧIяруя вайннал зузалтрал дувансса давур­тту. Щях дирхьуну дия къатри дуллали­сса кIанттурдал лагмасса чIумуйсса му­ххал, тахтардал чапарду, цIусса къатрай магъив дишин хIадур дурсса тахтарду, бакIракъутталий кIура бавну бия накI, ччатI баххайсса буткарду, щях дирхьуну дия кIичIиртту чIюлу буллай диркIсса тIутIив, къатIри. Вания гихунмай ттигу, хасъсса пишакартурал хъирив лавну, мяълумну кIул банссар хьусса зараллу.
Хьхьу–кьини къакуну вай гьантрай мукунма зий бия «Дагестанская сетвая компания» АО-лул пишакарталгу. Марч бищуннинма, халкьуннал къатраву, идарарттай лавхъсса кондиционердал гуж бутлайри тIий хьхьичI гьантрайва ттукIралмур масъала бия захIматну. ТтукI бакъа холодильникру, кондиционерду, щинал насосру къазий, халкь личIи-личIисса идарарттал телефоннайн оьвтIий, чяш бувккун бия.
Вайннащал архIал ччясса мутталий гьарзат низамрайн дуцинсса мурадрай зий бия МЧС-рал пишакарталгу.
Укунссара жапасса тагьар диркIун дур республикалул цаппара районнайгу. Зунттал районнай ххаллу дурцун, ттукI бакъа бивкIун бур «Дагестанская сетевая компания» АО-лул каялувшиндаралу­сса « Гергебель 110-Цудахар» ва «Хунзах-Шамильское» подстанцияртту.
Энергетиктурал мудангу, лахъи лаган къабивтун, цалла даву жаваблувну би­ттур дувайссар, ци захIмат-жапасса иширахун багьарчагу. Вана ва ххуллухгу марч бивщусса хьхьунува вайннал, ххаллу да­ххана дурну, дарзуну , ттукI нани бувну бур мукьвагу подстанциялийн.