Гъи дайдишайхту, инсантурал итабакьлай бур гъаттара муххал ххуллул чIарахсса авлахърайн. Мукун ургала акъа итабавкьусса ризкьилия хъуннасса нигьачIаву дур ххуллийх нанисса поездран ва машинарттан.
ДачIи шинал дянив 779 иш хьуну бур гъаттара муххал ххуллийн бувккун, нигьачIисса тагьар хIасул дурсса. Кьай духхайсса ва пассажиртал бувцуну нанисса поездирттал машинистуран анаварну бацIан бан багьлай бур поезд, ххуллийн бувксса ризкьилийн къащун. Мукунсса чIумал поездрай наниминнавунгу ццахханну дагьлай дур. Ва шин дайдирхьуния шихуннай 34 иш хьуну бур поезд гъаттарайн щусса. Ми ишру сававну зия хъанай бур локомотивру, гъагълай бур тормозирттал системалул турбарду ва кранну, зия хъанай бур поездирттал график.
Вай цимурцаннул хъунмасса харж буккан буллай бур «Аьрасатнал муххал ххуллурду» ОАО-лул компаниялия ва МахIачкъалаллал ххуллул отделениялия.
Муххал ххуллул зузалтрал, инженертурал ва техникалул персоналданул чаран ляхълай бур поезд ризкьилийн къащун, кIул бувну миннул заллухъру, бувчIинбавуртту дуллай бур. Амма ца вайннал хIарачатрайну цичIав къахьунтIиссар, агана гьарица инсан цала гъаттарал хъирив уклай акъахьурча. Цамуния къатIурча, оьл-кьунча бивкIуну, цанма хьунтIисса заралданул пикри бан аьркинни. КIулну бикIан аьркинни муххал ххуллул чIарах гъаттара итабакьин къадагъа дирхьуну душиву. Поезд гъаттарайн щусса чIумал тIабиаьтран, гьавалун зарал биян бувсса хъиннува хъунисса балардугу хьун бюхъайссар, муххал ххуллийх лавсун най бухьувкун навт, газ, загьрусса ва пIякь учайсса затру. Пикри бувара, цуксса бала хьунссар 70-80 навтлил цистерна инсантал ялапар хъанахъисса кIанттурдал чIарав кIура бавну, цIу лачIурча. Гъаттарал залуннал дурсса баччибакъашиву сававну циксса инсантуран бала хьунссар.
Ххишалану нигьачIаву дусса кIанттурду бур Тарумовуллал, Хасавюртуллал, Къарабудагъккантуллал, Къизлардал, МахIарамккантуллал, Бабаюртуллал райондалийсса муххал ххуллул чIарахсса кIанттурду.
ХIурмат бусса республикалул жямат!
ДакIний битияра, муххал ххуллийн бувксса гъаттара сававну авария хьурча, гъаттарал заллухъру аьчIа дирхьуну къуртал къахьунтIиссар, ми уголовный жаваблувшиндарайн кIункIу бантIиссар.
С. МахIадов,
Инфраструктуралул МахIачкъалаллал отделданул хъунама
ХIадур бувссар
А. Аьбдуллаевал
