Пенсиярттал хIакъиравусса бувчIин бавуртту


[dropcap]А[/dropcap]вгуст зурул 8-нний агьали кьамул бунни Республикалул пенсион фондрал каялувчи МахIаммад Исяевлул.
БувкIсса агьали бия взносирттал ва пенсиярттал законодательствалул хIакъиравусса личIи-личIисса масъаларттая цIухху-бусу бан ччисса.
МахIачкъалалив ялапар хъанахъисса Щайхулислам МахIаммадов ия цалва пенсия чIивисса бушиврий рязи акъашиву буслай. Ванал бусаврийн бувну, спортраву ва жяматийсса иширттаву бивхьусса захIматрахлу ванан багьлай бусса бур хъунмасса лагрурлул пенсия.
МахIаммад Исяевлул пенсияртту бишайсса отделданийн тапшур бунни Щайхулисламлул пенсиялул хъирив лавну, закондалул ххуллий кумаг бан.
Мукунма агьалинал ччя-ччяни сукку байсса масъалану бур страховой взносирттал бурж яла бутаврин хас бувсса. Ва масъалалул ялув бувкIсса агьалинахь МахIаммад Исяевлул бувсунни январь зурул 1-нния шихунмай страховой взносирттал ялув бацIаву федерал налогирттал къуллугърайн тапшур дуршиву.
МахIачкъалалив ялапар хъанахъисса Тамара ХIажимахIаммадовал бувсунни 2008 шиная шихуннай цилва пенсиялия дугьлай душиву 10 шинайсса страховой взносрах сальки хьусса арцу. Шиккува бувчIин бан, закондалийн бувну, ялув кIицI ларгсса взносру пенсиялул ва медициналул страхованиялух чара бакъа дулун аьркинсса арцу хъанахъиссар. Вава масъалалия бусан бувкIун бия Буйнаксккалий ялапар хъанахъисса Майсарат Маликова.
Пенсион фондрал каялувчинал кIицI лавгунни региондалийсса ишбажаранчитуран, цалла ихтиярду кIулшивруцIун, цайвасса буржругу кIулну бикIан аьркиншиву. Ишбажаранчитурал хьхьичIра-хьхьичI дулаван аьркинссар хIукуматрал ккаккан дурсса лагрулийсса страховой взносру. Ккаккан дурсса чIумуй взносру къадуллусса, ягу бурж дурсса инсантурая вай арцу закондалул ххуллий тIалав дуллантIиссар. Федерал къуллугърал судрал приставрайхчIин ва судрал органнаннайхчIин тIалав дантIиссар агьалинал дулун аьркинсса взносру, — увкунни махIаммад Исяевлул.
Ахирданий МахIаммад Исяевлул бувсунни пенсиялул ва медициналул страхованиялух дуллусса взносирттайн хъар хъанахъишиву агьалинал ласлантIисса пенсиярттал лагрурлду.

И. Саидова