«Халкьуннал дянивсса дусшиврул ламу ва ттизаманнул дунияллий халкьуннал дипломатиялул бугьлагьисса кIану» тIисса проектрал лагрулий МахIачкъалалив Миллатрал библиотекалуву хьунни Ккавкказуллал халкьуннал шаэр,Къабардин-Балкьарнал ва Къарачай-Чаргаснал халкьуннал шаэр, Ккавкказнал Чичултрал клубрал каялувчи, балкьарнал хьхьичIунсса шаэр ва таржумачи СалихI Гуртуевлул оьрмулул 80 шин шаврил юбилейран хас бувсса литературалул мажлис.

Зулайхат Тахакьаева
Гьашину СалихI Гуртуевлул итабавкьуну бур «Буруччара дустал» ва «Чинарданул ххютулу» тIисса лу­ттирду. Вай луттирду, цала цIагу чирчуну, авторнал пишкаш бунни хьунабакьаврийн бувкIминнан.
«Буруччара дустал» тIимур луттирай бивщуну бур авторнал цала балкьарнал мазрайн бувцусса Дагъусттаннал шаэртурал назмурду. Лакрал шаэртурава муний бивщуну бур Убурдал МахIаммадлул, ТтурчIиял Маммадайл, Муркъилинахъал Юсуплул, Ккурккуллал Щазал, Саэд Габиевлул, АбутIалиб Гъапуровлул, Курди Закуевлул, МухIуттин Чариновлул, Апанни Къапиевлул, Юсуп Ххаппалаевлул, МахIаммад-Загьид Аминовлул, Руслан Башаевлул, Мариян Щайховал (Миясат Муслимовал), Ссугъури Увайсовлул назмурду. «Чинарданул ххютулу» тIимур луттирай бивщуну бур Ккавкказуллал Чичултрал клубравун бухлахисса Адигнал, Азирбижаннал, Арманинал, Дагъусттаннал, Ингушнал, Къабардин-Балкьарнал, Къалмукьнал, Къарачай-Чаргаснал, Ух­ссавнил АьсатIиннал, Чачаннал шаэртурал назмурду, оьрус мазрайн дурцуссагу, цирда оьрус мазрай чирчуссагу.
СалихI Гуртуевлул барчаллагь увкунни Ккавкказуллал чичултрал клубрал Дагъусттаннал отделениелул хъунмур Миясат Муслимовахь ва «Дагъусттаннал уздантал» тIисса жяматийсса ккурандалул каялувчи Каримхан Оьмахановлухь мажлис сакин баврихлу. КIицI лавгунни совет заманнай паччахIлугърал чулуха литературалух хъунна­сса къулагъас диркIшиву, луттирду паччахIлугърал харжлугърах итабакьлай бивкIшиву.
«Чичултрал дянив дусшиврул арарду цIакьсса дуссия, кувннал произведенияртту куннал таржума буллай, уссурвалсса республикар­ттал чичултрал, шаэртурал луттирду итабакьлай буссия. Щала Совет Союзрай литература зий дуссия миллатру цачIун баврил, кувнничIан кув гъан баврил ялув. Мукун хIасул хьуссар Къайсин Къулиевлущал­сса ва Расул ХIамзатовлущалсса ттул дусшиву. Къайсин Къулиевлул Расул ХIамзатов ккалли айва Ккавкказуллал республикарттал шаэртурал дянив яла хьхьичIунма шаэрнан. Расул ХIамзатовлуллив Къайсин Къулиевлуйн учайва Гигант, кувннал кувннахь лажин лякъулун бакъача, щала билаятрал чичулт, шаэртал бавтIсса хъунисса съездирттай.
Ттула таржумарттал луттиран «Буруччара дустал» тIисса цIагу на нахIакь дакъар дирзсса. Ккав­кказуллал чичултрал дянив руцари хьусса дахIавуртту цIу дуккан дурну, хьхьичIва кунма уссушиврий ялапар хъанансса мурадрайри,» — увкуна СалихI Гуртуевлул

Миясат Муслимова:
— Ттигъанну бувккунни перестройкалул шиннардия мукьах жула билаятрал миллатирттал мазурдий­сса поэзия цачIун бавтIсса цалчин­сса антология. Кьуниясса шиннардил мутталий щала паччахIлугърал бувагу ца лу итабавкьусса чIумал ца инсаннал цала кашилуцIух цимивагу лу итабавкьунни, билаятрал мазурдийсса поэзия цачIун бувсса. Му хIакьсса гражданиннал виричусса тIулун ккалли бан багьайсса ишри. Ва хьунабакьаврий жунма асар хьунни Совет билаятрал чичултрал язисса аьдатру духлагавай душиву. Ми аьдатру дуруччиншиврул аьркинссар, совет заманнай кунма, куннал кув бувгьуну бикIан, жула хьхьичIунсса инсантурал цIарду тIитIлан. Глобализациялул процесс­рал жула мархри ххартI бавай бур. Агарда жува ми мархри къабуручларча, миннуйн щин къарутIларча, хурда хьунтIиссар литературалул аьдатругу, литература цурдагу. Расул ХIамзатовлул, Къайсин Къулиевлул, Давид Кугултиновлул аьдат­ру аьркинссар ирсирай дачин дан. Так цала халкьуннан бакъасса щала билаятрай ялапар хъанахъи­сса халкьуннан хас бувсса луттирду дунияллийн буккан баврийну жула хIурмат лавайсса СалихI Гуртуевлулгу ми аьдатру дирчIан къаритансса ша ласавур.
Хьунабакьаврий ялагу ихтилатру бувна Чачаннал шаэр, Адам Ахматукаевлул, МахIаммад Убринал варис, Аьрасатнал Чичултрал союзрал член ХIусайн ХIусайновлул, ДНЦ РАН-далул Мазрал, литературалул ва магьирлугърал институтрал директор МахIаммад МахIаммадовлул, «Дагъусттаннал уздантал» ккурандалул каялувчи Каримхан Умахановлул ва цайминнал.