[dropcap]М[/dropcap]илицанал подполковник Гапал ХIажиевлул цаппара шиннардий дуллай ивкIсса чичрурду ххилтIу дуллай, чIалай бур ва цукун буруккинттарай ивкIссарив къачагътурал азурда буллалисса Дагъусттаннал, республикалий хъанахъисса тахсиркаршивурттал, политикалул хIакъи-хIисаврттал. Ванал мурад бур республикалий низам дишаву ва мунил цIаний харж бувну бур цала оьрмугу.
Гапал ХIажиев оьрчIнийва милица хьунсса хияллай ивкIун ур. Ва ивкIун ур гьармур кIул бан ччисса, дуккин гъира бусса оьрчI. ЛяличIинура ххирасса диркIун дур Гапалдун астрономия, математика. Школалий ва математикалул яла хьхьичIунма ученик ивкIун ур. Школа къуртал бувну махъ увххун ур Дагъусттаннал университетрал математикалул факультетрайн. Шиккугу курсирал яла хьхьичIунма студентнан ккаллину ивкIун ур. Хъярч-махсартту бусса, аьчухсса Гапал цумурцагу компаниялуву бусравну икIайсса ивкIун ур, КВН-лул командалул чялишсса гьурттучинугу ивкIун ур.
Буттан Шамиллун, ниттин Рукьижатлун пахру бивкIун бур гьармуниву чIивима уссингу, шанмагу ссингу эбратну хъанахъисса итххявхсса арсная. Ванал цала пиша язи бувгьушиврий мукIруну бивкIун бур нину-ппу. Амма иш цамур ку­ццуй багьну бур. Аьралуннаву къуллугъ бувну увкIун махъ Гапаллул пик­рирду баххана хьуну бур.
Ленинградуллал областьрай­сса аьрали частьраву къуллугъ буллалисса чIумал Гапал радиоперехватрал хьхьичIунсса пишакарнан ккаллину ивкIун ур. Шикку ванан бувчIуну бур цала кIулшивуртту, цIуллу-цIакьшиву, хIал кIулшиву, ччимур тагьарданий тIайласса хIукму бан кIулшиву милицанал даврин хас дарча, цаява оперативник хIисаврай ххишаласса мюнпат бикIаншиву.
2000-ку шинал Гапал ХIажиев увххун ур МахIачкъалаллал виваллил иширттал управлениялий къуллугъ буллан. Управлениялул каялувчитуран ччяни хIисав хьуну ур бюхъу-бажар бусса зузала. Гапал ивтун ур сакиншиндарайсса тахсиркаршивурттащал талатисса отделданул аналитикну, мунияр махъ гьан увну ур экстремизмалийн къарши бавцIусса подразделениялувун.
-Жун Гапал шананвагу къаи­кIайсса кунма бизайва, му мукссава цала даврихух лавгун икIайва, тIий буслай бур ванащал архIал зий бивкIми. Ванал хьхьу-кьини къаувкуну, ччимур чIумал оьвчайсса бивкIун бур цала зузалтрайн, тахсиркар угьансса сант дирирну духьурча. Ванал ашкара дурну дур цикссагу оьхIалсса тахсиркаршивуртту, цимилагу гьуртту хьуну ур ярагъуннил балгусса къачагътал бугьлагьисса хасъсса операцияр­ттавух, лякъайсса бивкIун бур миннал къуш бивщусса, ярагъ лабивт­сса кIанттурду.
Ванал мяйжаннугу цимивагу цала коллегахъал оьрмурду ххассал бувну бур. Ца чIумал отделданийн баян бувну бур МахIачкъалаллал ца кIичIираву ярагъ ва пIякь учай­сса зат дирхьу­сса къачагътурал машина бавцIуну бур куну. Оперативниктал бувкIсса чIумал ца тахсиркар тIивтIусса багажникрачIа авцIуну ивкIун ур, гама — салондалуву. Тахсиркартал ва милицалт кувннайн кув битлан бивкIун бур. Му мутталий Гапаллул хIал кIулну бувсса операциялийну милицалт цIуллу-сагъну зана хьуну бур. Хьхьу-кьини къаувкуну, уххаву- авчIаву къакIулну, зий ивкIун ур Гапал, къачагътуран тахсиркартуран ххуллурду кьукьинсса цIу-цIусса чаранну ляхълай.
Цахьхьунма рай къабулайсса кьян­кьану авцIусса милицанал подполковникная къачагътурангу кIулну бивкIун бур, му миннал ­оьсса душман хьуну ур.
2003-ку шинал захIматсса щаву дирну, ивчIай-уккай тIисса тагьарданий ивкIун ур Гапал. Му чIумал нину-ппу тавакъю буллан бивкIун бур арснахь нигьачIисса даву кьарити, вила кIулшивуртту цамур пишалий ишла дува тIий, амма арс цала оьрмулул мяъна-мурадну чIалачIисса пиша баххана бан рязи къавхьуну ур. Ца чIумал мунал цала уссихь увкуну бур: «Авлахърай цаннаягу талатала шайссар. Агана гьарица кьини Дагъусттаннал цIаний ци-дунугу дулларча, тагьар чара бакъа даххана хьунтIиссар».
2010 шинал Гапал ХIажиев ивтун ур МахIачкъалаливсса Аьрасатнал МВД-лул Агьаммур управлениялул Ухссавнил Федерал округ­райсса экстремизмалийн къарши бавцIусса регионнал дянивсса 1-мур оператив-розыскной отделданул хъунаману. Му чIумал цала опытрайну ва пишакаршиврийну Гапал ХIажиевлуща бювхъуну бур милицанал зузалт оьрмурдацIа бувсса ва цаппара къачагъшивур­ттавух гьуртту хьусса тахсиркартал ашкара бан.
Ва цимилагу, къаитанну тIий нигьал уллай бивкIун бур, амма Гапал цалагу цала къуллугърал бурж би­ттур бан махъаллил къавхьуну ур.
ИвчIан хьхьичI кьини ва буслай ивкIун ур цала зузалтрахь чIявусса зурдардий луглай ивкIсса тахсиркартурайн увкшиву ва ми бугьан хIадур хъанай ушиву.
2010 шинал сентябрь зурул 12-мур кьини Гапал ХIажиев даврийн най ивкIун ур. Ххуллул шанбачIулий ванал машиналул чIарав кIяласса «семерка» бавцIуну бур. Цаппара секундирттал дянив автоматирттава биту-ххиту бувну бур га нанисса машиналийн. Гапал усса кIанай къуртал хьуну ур. Аьрасатнал Президент Владимир Путиннул хIукмулийну, жандалия ка гьаз дурну тахсиркартуращал талай ккаккан дурсса къучагъшиврухлу милицанал подполковник Гапал ХIажиевлун аьпалул хьуну махъ дуллуссар Аьрасатнал Виричунал цIа.
Гапаллул махъ ливчIун бур кIива ххаллилсса душ – Амина ва Ххадижат. Нину ва иш хьуннин аьпа­лул хьуну дур. Арснал бивкIулул гъагъан увну ур кьянкьасса буттагу: инсульт хьуну, хъунма хIал къавхьуну дунияллия лавгун ур.
Гьай-гьай, бухIан захIматсса иш бур оьрмулул аргъираву Гапал кунмасса ххаллилсса инсантал дунияллия лагаву. Ванал ттигу цикссагу ххаллилсса давуртту данссия респуб­ликалулгу , билаятралгу цIаний.
Ва оьрмулуцIа увсса иширал хIакъираву мугьлат бакъа дартIсса совещаниялий Дагъусттаннал Виваллил иширттал министр Аьвдурашид МахIаммадовлул увкуна: «Хъунмасса хIаллай луглан багьантIиссар жунма Гапал ХIа­жиевлул кIану бугьансса инсаннах».
Гапал ХIажиевлул цIа дирзун дур Кьубиял школалун, шяраву ванал аьпа абад бан дацIан дурну дур гьайкал.
«СсахчIав къабурувгун, тIай­ламунил цIаний, яхI-къириятрал кьануннай оьрму бутлатисса, мукунма цала оьрчIругу тарбия буллали­сса 5-10% инсантуравасса цара нагу. На хIарачат буллай ура навагу, ттула гъан-маччамигу ялапар хъанахъи­сса дунияллий низам дуруччин.
…Хъунасса Заннайнгу лаизлай ура цанна къакьамулсса тIуллая нава арх ува тIий», — чивчуну бур милицанал подполковник Гапал ХIажиевлул блокнотрай.
Андриана Аьбдуллаева