[dropcap]А[/dropcap]вгустрал 20-нний Аьхьхьахъиял райондалий КIаратIиял шяравалличIату арх бакъасса, ттарлил вацIлучIа хьунни «Тархо» тIисса этнокультуралул фестиваль.
Ганий гьуртту хьунни Дагъусттаннал БакIчи Рамазан Аьб­дуллатIипов.

ХIасан Аьдилов
Республикалул хъунаманал ххал бунни райондалул шяраваллал сакин бувсса майданну, микку дия личIи-личIисса кIанттул ду­­к­рарду, багьу-бизулуву ишла дай­сса матахI. Райондалул библиотекалун АьбдуллатIиповлул пишкаш бунни «Жу Аьрасатнал халкьру». ЧIявумиллатру бусса Дагъусттан» тIисса лу.
Фестивальданий гьуртту хьуминнал хьхьичI махъ лахълай, Рамазан АьбдуллатIиповлул укун увкунни: «Аьркинссар уттара дуккан дуллан жулла аьдатру, миннуйну тарбия буллан жагьилтал. Жулва ппухълуннал гьармур дайсса диркIссар дю­хъан дурну, дакIницIану. Жулва тарих хъамакъабитаншиврул, жула ппухълуннал культура уттарану яданшиврул, жува дузал барду поэзиялул театр, бакьин барду Дагъусттаннал паччахIлугърал цачIусса тарихрал ва архитектуралул музей, тIитIарду мемориалданул комплекс «Ахульго». Циняв шяраваллаву ва шагьрурдай дузал барду Аьрасатнал миллатирттал аьдатирттал культуралул центрду. Культура – рувхIанийсса бакIщаращир», — увкунни Рамазан АьбдуллатIиповлул.
Республикалул каялувчинал тIимунийн бувну, вай давуртту дуллалиссар Дагъусттаннал сий гьаз даншиврул. ДакIний битан аьркин­ссар, ххуйсса балайчитал, къавтIалт, суратру дихьулт бушаву къагьассар миллат культура дуссаннун ккалли баншиврул: аьркинссар багьу-бизулувугу, щурущавривугу, янна-ус лаххавривугу, кувннал кувннащал­сса арардавугу, даврийгу культура ядуван.
Фестивальданул мурад бия бюхъайссаксса чIявусса инсантал цачIун баву, байранну, дялахърурду гьарза даву. КIаратIав бигьалагай кьини балайчитал бувкIун бия Шамиллал, ЧIарадиял, УнцIукIуллал, ТIиляратIиял ва цаймигу районная.
Фестивальданий сакин дурну дия Камил Тохо тIисса художникнал суратирттал выставкагу.
Фестивальданий жу хъамалу бувнав яруссаннал ххунчIай ва хьхьахьхьарттуй.
Концерт къуртал хьуну махъ фестивальданийн бувкIми къавтIун бизлай бия къищу макьаннай.