Август зурул 5-нний Къяннал шяраву дия хъинну хъуннасса уттарашиву. Агьамми тяхъашивуртту хас дурну дия, уттигъанну Новостройрай хьусса Сиражуттин Илиясовлул цIанийсса мини футболданул турнирданий Къяннал жагьилтал ххув хьуну кубок ласаврийн. Ва иширацIун Къяннал жяматран пикри хьуну бия шяраваллил кьинигу дуван. Ва кьинилул давурттая бувсуна ванил ца яла хьхьичIунма сакиншинначи НурмахIаммад МахIаммадовлул.

— Цалчин, кIюрххила ссят ряххунний лавгру жула нитти-буттахъул паракьат бувсса хIатталлив кьулгьу-кьуран бу­ккин. Ва кьинилийн хIадуршинна дуллай, Вихьуллал аьрщарай­сса ДяркъущинацIалу тIисса кIанттаяту шяравун дияннин дишарду цIусса щин дурцу­сса шланг. Жула шяравачутурал дуллусса арцух жу дакIний буру буван шяраву ца чIиви-хъунсса «Банкетный зал».
Махъсса шиннардий дяшяравусса мадарасса къатри инсантурал кьадитаврийн бувну лекья-пIякьу хьуну дур. Тия хху­л­лия бурувгсса чIумалгу, вай къатрал шяраваллил сий зия дуллай дур. Мунияту пикри хьунни тай леркьсса къатри ду­сса кIанттуцIух яларай терра­ссарду дуван мурхьру бугьансса. ХIасил, цIу буккан буван ччай буру Казбек Мазаевлул литературалул даптарданийн ла­хъан бувсса Къяннал хIавирду. Дур цаймигу дуван дакIнийсса давурттив. Мизитрал чIарав цIана буссар жагьилтал, ги­ккусса ца кIантту лекьлурдацIа марцI буллай.Гикку жу дакIний буру, бивкIу хьуни инсантал кьулгьу-кьурандалий шябикIавансса къатта буван.
Мини футболданий ххув хьусса жагьилтуран дипломру булунтIиссар. БикIантIиссар, хIурмат лавайсса хъамал хьуннав, жямат хьуннав, лагма лавгун, ссупралух щябивкIун, махъру лахълахъисса, балайрду тIисса, къавтIавуртту дуллали­сса мажлисгу. Кьунниялай Лак­рал театрданул ва жула культуралул зузалтрал клубраву ккаккан дувантIиссар концерт. Ссят хьхьунил 11 шайхту, шяраваллил хьхьичIсса кьунттаяту дувантIиссар салют. Вари жул агьаммур программа.
Тяхъашивурттавух гьур­тту хьун бувкIун бия шагьрурдая чIявусса жагьилтал. Бия мукунма хIурмат лавайсса хъамал. Хъамаллуравух бия: ДР-лул Жяматийсса палаталул каялувчинал хъиривчу Ссапарбаг Аьбдуллаев, Сиражуттин Илиясов, Лак­рал райондалул бакIчи Юсуп МахIаммадов, Рапи Абакаров, Лакрал райондалул азарханалул хъунама хIакин АьвдурахIин Дибиров, Ккурккуллал шяраваллил школалул директор , шаэр Даниял Магьдиев ва цаймигу.
Мини футболданий ххув хьусса жагьилтурал хъамалралущал цачIуну тIутIив дирхьуна Къяннал шярава Хъун дяъвилийн лавгсса чиваркIуннан хас дурсса мемориалданучIа. КьинилуцIун дархIусса чIяруми давурттив ухха­ву къакIулну дачин дурну ия НурмахIаммад МахIаммадов.

Репортаж хIадур дурссар ХIажимурад ХIусайновлул