Росрыболовствалул Бар­гълагавал Каспийс­каллал кIанттул управлениялул дачIи шинайсса даврил хIасиллу дунни.

А.Аьбдуллаева
Ва чIумул дянив балугъ бугьаврицIун ва щинал биолог ресурсру дуруччав­рицIун дархIусса 2631 тIулда­къашивуртту хьуну дур. Дирхьусса аькIри 6 миллион ва 168 азарда къурушрайн дирсса хьуну дур. Вай хъанай дур ларгсса шинал вара чIумувунияр 20% ххишаласса. (2016 шинал – 5 миллион ва 112 азарда къуруш). 30% ххи хьунни ларсъсса аькIригу. Ми хъанай дур 4 миллион ва 157 азарда къуруш. ЯлувбацIавуртту дурну, ххуттава бувкминнаща зер­ххунни 4 тонна ва 167 кг. частик журалул ва тонналия ливчусса осетр журалул балугърал.
Хъинну чIявусса балугъ зевххуну бур нанисса шинал май зуруй Тарумовуллал райондалий Кочубей шяраву. Ца адиминачIа ляркъуну дур закондалуцIун къаавкьуну бувгьусса частик журалул балугърал 1210 кг.
Ва иривну ур, Баргълагавал Каспийскаллал кIанттул управлениялул ва ФСБ-лул зузалтрал цачIу рейд дуллали­сса чIумал.
ДачIи шинал дянив закон­далуцIун къабавкьуну балугъ бугьлагьисса инсантураща зевххуну бур балугъ бугьайсса 4136 ярагъ ва 62 транспорт.