«Хъирив-шамхал» тIисса термин бакIчичрурдаву (источникирттаву) цукун, ци журалий ишла дуллай бивкIссарив буслай, Дагъусттаннал цIанихсса тарихчи, профессор, востоковед Амри Шихсаэдов тIий ур укун: «Шамхалнал вариснал (наследникнал) титул Дагъусттаннал литературалуву хьхьичIра-хьхьичI жунна хьунадакьлай дур «Тарихи Дагестан» тIисса чичрулуву.

Му хроникалул личIи-личIисса сияхIирттай чIяруну ишла дурну дур «кирим шамхал» тIисса термин, чан-кьанну ишла дурну дур «чирим» тIисса термингу, хъиннура чанну ишла дурну дур «хириб-шамхал» тIимур. Гихунай Шихсаэдов буслай ур Сагада тIисса шяраву яхъанахъисса Аьлиев фамилия дусса инсанначIа 1962-кусса шинал цанна ляркъусса канихчичрулия ва му чичрулий жура тIисса термин кIицI ларгун душиву «хириб-шамхал» тIисса формалий. Муний куну бур тIар укун: «…это относительно того, что полагается шамхалу со стороны раийатов ежегодно: общество Караха обязана вносить 500 овец шамхалу, а 400 – хириб-шамхалу; точно также общество Касрахи обязано шамхалу 500 овец, а хириб-шамхалу – 400 овец».
Шикку жунма чIалай бур А. Р. Шихсаэдовлун ляркъусса бакIчичрулул тасттикь буллай бушиву Б. Малачихановлулгу, Х. Хашаевлулгу, Р. Маршаевлулгу кумур, яни «хириб-шамхал» терминдалул этимология бавхIуну бушиву «хъирив» тIисса хIакьсса лакку мукъуцIун.
Ва суалданунсса щак бакъасса ахир-жавабнугу жура утти дуцинну Аьли Къаяевлул архивравасса материаллу. Вай цирдагу жу цалчинну элмулул дунияллийн дуккан дуллалиссагу. Жулла кIунттихь дур Гъази-Гъумучиял Шамхаллугърал кьадитурал цала тухумраву ирсирай нани дурну диркIсса дишалардал сияхIру.
Ва чаннану-михакрангсса ча­гъарданул чIапIул лагру дур 20 см. уттайннай, 24 см лахъиннай дусса, чагъарданул зумардугу дуцари хьу­сса дур. Текст чивчуну бур лухIисса щекьирай кьаламрах. ЧапIул лажинмур чулий чирчуну дур Шамхаллугърал хъунама кьади ХIажи-МухIий ад-Диннул ихтиярданий­сса личIи-личIийсса шяраваллая ва жяматирттая датIайсса диркIсса дишалардал сияхI. Текстрал ахирданий бивщуну бур Зуд-Диннул мугьругу, кьадинал вариснал чивчунугу бур укун: «На, МахIаллил арсну хъанахъисса Зуд-Диннул, вай гьарца зат чичав хъинну ччянирасса сияхIрая. СияхIрал лув бур чирчусса чIумул хатIгу – раби-аль-аввалль арул… ряхцIалуку шин гьижрилий».
Аьли Къаяевлул тIимунийн бувну, шикку лях ливчIсса махъну хъанай бур «ттуршлий» тIисса махъ, яни «арулттуршлий ряхцIалуку шинал» (1359 ш).
ЧIапIул гамур чулух чирчуну дур шамхалтуран ва хъирив-шамхалтуран дагьайсса затирттал сияхI.

«Шамхалнан ва хъирив-шамхалнан булун аьркинсса буржирдал сияхI»

1) Кьарахъиял* жяматирттал: 500 тта — шамхалнан, 400 тта – хъирив-шамхалнан.
2) Гулебки* шяраваллил гьарца къатлуяту багьлагьиссар ца-ца тта.
3) АнцIарукьиял* жяматраяту: 300 тта – шамхалнан, 400 тта – хъирив-шамхалнан.
4) АнцIаракьиял аьрщарай бу­ссар зунтту, му зунттуйсса яттиятугу багьайссар 1000 тта ва 13 оьл – вай хьуну бивкIсса тахсирдахсса хIакьри.
5) ЧIамахъиял* жяматрал – 500 тта.
6)ТIиндиллал шяраваллияту – 20 къяча.
7) Арчиял жяматраяту: 130 тта — шамхалнан , 30 ку – хъирив-шамхалнан.
8) Ххюлуссунная – 13 тта.
9) Буршиял агьалиная – 10 тта.
10) СумбатIуллая – 50 тта (зун­тту ишла буллалаврихлу).
11) Шаллал шяраваллия – 1 балчан
12) Хьхьургъиял жяматрая – 1 бидав, 1 ккацца ва 30 тта.
13) Бурки-Ххяннаяту – 1 къяча ва 12 чIи.
14) Даяхъиял* жяматрая – 30 парча муккурданул.
15)Вайкссара муккурданул янна – Нухъи, Нуци Гъулатти, ХIурахъи, Сагуни, Мулебки шяраваллаятугу*.
16) Шамхалнан багьайссар ЧIа-БакIу* тIисса зунттугу, мичча бучIаван аьркинссар гьарца шинах 50 тта.
—————————
*Кьарахъи – Къара-Къуйсулул бакIщаращацIухсса яруссаннал агьалинал махIла, шивун духхайсса диркIссар 23 шяравалу.
*Гулебки – Ахъушиял райондалийсса шяравалу.
*АнцIаракь – ЧIарадиял райондалул кьиблалул чулий яруссаннал 19 шяраваллия сакин хьуну бивкIсса махIла.
*ЧIамахъи (Чамалал) – Аьндиннал Къуйсулул куямур чуллайх хIасул хьуну бивкIсса, 16 шяраваллия сакин хьусса яруссаннал махIла.
* ТIинди – 26 шяраваллия сакин хьусса, Аьндиннал Къуйсулул урчIамур чулухсса яруссаннал махIла.
*Даяхъи – Дахадаевуллал райондалийсса даргиял шяравалу ва мунил лагмасса мащив.
*Муккур – янналул жура
*Нухъи, Нуци, Гъулатти, ХIурахъи, Сагуни, Мулубки – даргиял шяраваллурду.
«ЧIа-БакIу» – ва Хьурттал кIанттайсса зунтту бунуккар.
ХIасибул калам, жува цIанакул ишла бувсса, ХIУ ттуршукулийн багьлагьисса, Шамхаллугърал кьадитурал архивраватусса документ­рал аьщуйн щуну чIалачIи дуллай дур «хъириб-шамхал» тIисса терминдалул траскрипция, чIалачIи дуллай дур му термин лярхъуну диркIшиву метрополиялул хъуншагьруну хъанахъисса Гъази-Гъумук.
Ванилва исватну бувчIингу буллалиссар ттизаманнул хъиривбизултран, кIанттул халкьуннал мазгу чулухух бивхьуну, политикалул ва социал экономикалул терминнал этимологияртту кьатIухсса цайми-цайми чуллай ххал дуллай буккаву – му нахIакьдансса захIматрайн буклакисса хIарачат бушиву.
«Хъириб-шамхал» тIисса терминдалун цала Аьли Къаяевлулгу хас дурну дур кIира макьала. Миннувасса цалчинмур макьала «Хъирив-шамхал» авторнал дуллуну дур «Лакку маз ва тарих» тIисса энциклопедиялул словарьданий. Вана микку чивчумур: «Ла­ккуй, Шамхаллугърал заманнай, цIусса шамхал тахлий итлатисса чIумал, мунащала архIал рищайсса диркIссар ирсирай мунан кIанттай ацIанманал цIагу, «хъирив-шамхал» тIисса титулгу дусса.
Дагъусттаннал цаппара щархъурдай диркIссар дирхьуну шамхалнан ва хъирив-шамхалнан дулавансса дишалардугу. «Хъирив-шамхал» тIисса титулданул форма чIун наниссаксса даххана хъанай, ахиргу кIура дарну дур «кърим-шамхал» тIисса куццирайн. Цаппара документирттаву му хьунадакьлай дур «ххириб-шамхал» тIисса формалийгу».
Аьли Къаяевлул ва макьалалул, цIусса шамхал ва мунал хъиривчу тахлий итаврицIун дархIусса цурда церемониялул мюрщи-хъунисса ишру бакъассагу, жухьва буслай бур чIумул лахъишиврий му титул чичаврил ва учаврил форма даххана хъанай диркIшиву, буслай бур мукунма вара титул «ххириб-шамхал» тIисса журалий чирчусса цайми-цаймигу хьхьичIазаманнул документру бивкIшиву.
Шиккува учин, багьлай бур Аь. Къаяевлул кIунттихьхьун биривну бивкIсса ми документру, бакIщаращул чичрурду хIакьинусса кьини лякъин хъанай дакъашиву, ягу тачIав зана ритан къахьун­сса кьяйдалий дакъа хьуну душиву «культуралул революциялул» шиннардий. Микку махIаттал хъананссагу личIлай бакъар, личIлай бакъар, жунма ххуйну кIулну буну тIий цукун рахIму бакъа бири-бат дур­ссарив тай шиннардий жула тарихрал ва культуралул памятникру, жунма кIулну буну тIий ци бала биян бувссарив аллагьакъултрал Гъази-Гъумучиял мизитирттал ва цивппа заллусса инсантурал луттирдайнгу 30-ку шиннардий. Му вандализмалул щатIи хъиннува цIун хьунну ва оьхIалну бивщунугу бур жула лакрал этнотерриториялийх.
Къулагъас къадансса да­къар Къаяевлул кIилчинмур макьалагу, «Хъириб-шамхал» тIисса цIанилусса. Ва цурдагу авторнал чирчуну дур цува ссивир увну гьан увну ивкIсса Къазахъисттаннай, «Лакку мазрал ва тарихрал материаллу» тIисса канихчичрулуву. Микку бур укун тIий: «Лаккуй, Шамхаллугърал заманнай, цIусса шамхал увчIлачIисса чIумал, мунацIуна ккаккан айсса ивкIссар хъирив итанмагу. Мукун­сса инсанну личIи айсса ивкIссар ягу арс, ягу, уссу, ягу…* Мунал титулгу диркIссар «хъириб-шамхал» тIисса, яни «хъирив итансса шамхал» тIисса мяъналий.
Шамхалтал арнил кIанттайн бивзун махъгума шамхалгу, хъирив-шамхалгу итаврил церемония дай­сса диркIссар Лаккуй. Амма кьанив яхъанахъисса къумукьнал тIурча, бикIлила жула лакку махъну «хъириб» тIисса калима зумух ласлан бивкIссар дахханану, «къирим» тIий. Ча, мунийн бувну къумукьнал дянив машгьур хьусса «къирим-шамхал» тIисса термин – му лакку мазраяту дахханану кьамул дурсса «хъириб-шамхал» тIисса терминни.
Къарачайнаву яхъанай бур «Къирим-Шамхалхъул тIисса фамилия дусса багтал.Му фамилиялул заллухъруннал тIимунийн бувну, миннал бакIрайрасса ватанну бивкIун бур Дагъусттан. ЧIалай бур гай хъириб-шамхалтурал наслулия­сса агьлу бушиву, цила чIумал Ла­ккуяту ягу кьанияту Къарачайнавун бивзун бивкIсса.
Шамхаллугърал чIумал хъириб-шамхалтурангу, цивппа шамхалтурангу Дагъусттаннал цаппара жяматирттая дагьан дайсса диркIссар хъинну хъунисса дишаларду».