Нитти-буттал кьини хьунни вай гьантрай 3-мур силистталул изолятордануву. Укунсса кьинирду шайссар шикку шанма зуруй цал. Му чIумал нитти-буттаща ва гъанчунаща бюхъайссар дуснакьравусса цала гъан-маччами цукунсса шартIирдай ялапар хъанай бурив, миннащал цукунсса тарбиялул даву дуллай бурив ххал бан ва идаралул зузалтращал ихтилат бан.
Ва кьини 3-мур изолятордануву хозяйствалул давурттаха зузисса отрядравуминнащал хьунабакьин бувкIун бия 20-ксса инсан. Идаралувусса низамрая бусласисса инструктаж дурну махъ, хъамал буххан бунни къатравун.
Изоляторданувун бувкIминнаща ва кьини бюхъайссар идаралул каялувчитурахь ва отрядрал хъуниминнахь цIухху-бусу бан. Хъамаллуран хьхьичIва-хьхьичI ккаккан бунни столовая. Вайннаща бюхълай бия менюрах бурган, дурсса дукра ххал дан. Хъирив ххал дунни отрядравуми ялапар хъанахъисса къатри, вайннал ялапаршиндарал шартIру, ккавккунни цала гъан-маччаминнал цукун гьан дуллай буссарив даврия махъсса чIун.
Изоляторданувусса хьунабакьаврий гьуртту хьунни Хасавюртуллал прокурорнал кумагчи, юстициялул чIивима советник Мавлидин Аьлиев. Ванал ххал бунни цукунсса шартIру дурив изолятордануву хозяйствалул давуртту дуллалиминнан, кьамул бунни цала-цала масъаларттал хIакъираву цIухху-бусу бан ччими.
— Идаралул зузалтран аварасса дикIай «нузру тIиртIусса кьини». Изоляторданувун бувкIми хьунагубавкьуну, миннал мюхчаншиврул ялув бацIан багьай, амма администрациялун бувчIлай бур цуксса аьркинссарив вай хьунабакьавуртту ва хIарачат буллай бур ми гьарица кварталданий дан. Гъан-маччанаща бюхълай бур дуснакьравуминнал оьрму, багьу-бизу ххал бан, дуснакьравуминнащагу, агана ми низамрайн мютIийну бухьурча, цал ххишалагу хьунабакьин бюхълай бур цаламиннащал, — тIий, буслай ур изоляторданул хъунама, виваллил службалул полковник МахIаммадхан Азоев.
Дуснакьравусса гъанчуная личIи хъанай, хъамаллурал дакIнийхтуну барчаллагь увкунни изоляторданул хъуниминнахь чIа тIисса хьунабакьавуртту дуллай тIий.
