«Человеческий капитал» тIисса Дагъусттан Республикалул хьхьичIунсса проектрал лагрулий итникьини Гъумукун лавгунни литературалул ва магьирлугърал ишккаккултрал творчествалул десант, Дагъусттаннал халкьуннал шаэр, Чичултрал союзрал хъунама МахIаммад АхIмадовлул ва Аьрасатнал магьирлугърал лайкь хьусса ишккакку, Лакрал театрданул каялувчи Бадрижат МахIаммадхIажиевал каялувшиндаралу.

[dropcap]Хь[/dropcap]унабакьаврийн бувкIун бия жагьилтал, дуклаки оьрчIру, идарарттал зузалт. Райондалул бакIчинал хъиривчу Абакар Къюннуевлул, хъамаллурахь ала-ссаламгу бувну, кIицI лавгунни ва журалийсса творчествалул хьунабакьавурттал агьамшиву цуксса хъунна­сса дуссарив. Бувсунни махъсса шиннардий райондалул социал-экономикалул оьрмулуву хьусса хьхьичIуннайшивурттая ва лакку улклул магьирлугърал ирс ябаврил ххуллий дуллалисса давурттая.
Десантрал делегациялувух бувкIми агьалинащал кIул бувну махъ, Бадрижат Ма­хIаммадхIажиевал бувсунни миллатрал аслисса магьирлугъ ядаврил цIаний театрданул ци проектру чулийн дуккан дуллай буссарив. КIицI лавгунни лакрал миллатрал фольклорданул ирс гьануну лавсъсса спектакллал театрданул репертуардануву хасъсса кIану бугьлай бушиву.
МахIаммад АхIмадовлул Дагъусттаннал рувхIанийсса ирсирал вирдакIну Гъумучи хьушиву кIицI лаглай, оьвчаву дуруна жагьилтурайн ппухълуннал тарих ва аьдатру дуруччин, никирая никирайн ирсирай дачин дуллан. Бувсуна цала творчествалия, бувккуна шеърирду.
Дагъусттаннал Халкьуннал артист, Музыкантътурал союзрал хъунама, Хан Башировлул бувсуна Гъумучиял шярава бувксса магьирлугърал ишккаккултрая ва цала творчествалия.
Дунияллийх цIадурксса Гъумучиял сянаткартурал, хаснува заргалтурал касму духлаглагаврий чIурчIав дуллай, Дагъусттаннал Халкьуннал художник МахIаммадаьли МахIаммадовлул кIицI лавгуна ми аьдатру цIудуккан даврил ялув зун багьлай бушиву.
Лакрал театрданул актертурал ккаккан бувна «Ккурккуллал Щаза», «Ччаву ва макь», «Гъази-Гъумучиял серенада» спектакльлавасса бутIри, увкуна балайрду.
Ккаккиялун дирхьуну дия МахIаммадаьли МахIам­ма­дов­лул ва Дагъусттаннал лайкь хьусса художник, Лакрал театрданул хъунама художник Аскар Аскаровлул давуртту.