ЦIувкIрав бавтIун бия ттигъанну шагьрулий ташурду бувсса СантIухъал ХIасаннул, ЦIаххаевхъал, Зиркьуевхъал ва ХIасанхIусайнов ХIажикьурбаннул агьлу.

ПатIимат Рамазанова
Ваниннин цаппара шиннардил хьхьичI 1-мур ЦIувкIратусса Халилов АьвдурахIманнул арснан Мурадлун хъатIи шагьрулий буварчагу, хъирив гьантрай шяравун лавгссия гьалмагъайл ва жалиндалул ляхъин — жалин щинав лагаврил аьдат цIудуккан дуван. Бусравсса инсанталгу лагма лавгун, лахъа- хъунну ва сийлий дурссия му ххаллилсса аьдат. Зюннавчи, дачIучигу бувцуну, бала-гьалайрдай, тяхъану, хIазну дурссия. ХъатIул балайрду, буттахъал макьанну гюргу тIутIи дурну.
Вана утти вай гьантрайгу ЦIувкIрав мура бала- гьалайрдай­сса тяхъашинна, уттарашинна дия. Халиловхъал ва Хасаевхъал кулпатирттал дайдихьу дурсса аьдат барачат хьуну, ЦIувкIрав бавтIун бия ттигъанну шагьрулий ташурду бувсса СантIухъал ХIасаннул, ЦIаххаевхъал, Зиркьуевхъал ва ХIасанхIусайнов ХIажикьурбаннул агьлу. Бувккун бия жямат зюннав- дачIучитуращал архIал, цIуну ташурду бувсса ХIасан ва Раисатгу, Илдар ва Асиятгу лахъа- хъун буван, жалинт варакъащал щинав биян буван, буцин. МахIларду ва зунттурду, арду, кьулларду шадсса чIурдал буцIин бувну бия. Шиккува бусанна, СантIуев Баширдул арнал ХIасаннул жалиндалул хъирив наврузбагнал уссурвал шагьрулийгу ппухълуннал лаххиялуву, чаргаснал чиллу чухъраву лавгссия. Шяраву жалин щинав нанийнигу, ххуйя миллатрал лаххия. Даркьуну дия душваврай лачакру ва бузмарду. Цайми ххуйшивуртту кIицI къалагларчагума, лавгзаманнущалсса ара хIура дуккан къаритлатисса, ппухълуннал аьдатирттал хIурмат жучIава бушиву иширайну кка­ккан буллалисса аьдат дур.
Хасну ттун ттуннагу ца яла ххирамур аьдатри жалин щинав лагаврил аьдат. Ва ялагу. Август барз зунттаву неъмат ласаймур чIун дикIайхха! Щюлли дарайрттавун дахьларгсса зунттал тIабиаьт, читIри кунма тяхъасса оьрчIал чIурдал лавсун нанисса махIларду (укунсса уттарашинна так гъинтнил чIумал, шагьрурдая хъамал бувкIнийри дикIайссагу!), рищу- руцу кIичIирттавун тамашалий бувк­сса агьлу, лагмарасса хъархъаллал ласласисса хъатIул балайрдал чIурду. Мюрщи оьрчIал чIюлу бувну, тяхъа- шад буккан бувай Кьуцма- ратIувсса кьулла! ЦIакь хъананнав лавгзаманнул ххаллилсса аьдатру.