[dropcap]А[/dropcap]вгуст зурул 23-нний МахIачкъалалив, Дусшиврул Къатлул конференцияртту дувай залдануву дайдирхьунни ирглийсса диннал жагьилтурал форумрал даву. Ва утти дунияллул халкьуннал дянивсса мукьилчинсса форумри Дагъусттаннай хъанахъиссагу.

П. Рамазанова
Микку гьуртту хьунни Да­гъусттаннал БакIчи Рамазан АьбдуллатIипов, СКФО-лийсса Аьрасатнал Президентнал полпреднал аппаратрал хъунама федерал инспектор Василий Колесников, Аьрасатнал Президентнал управлениялул динийсса идарарттащал зузисса Департаментрал маслихIатчи Андрей Третьяков, Миллатир­ттал иширтталсса буллалисса федерал агентствалул хъунаманал кумагчи Олег Серегин, респуб­ликалул муфтий АхIмад-хIажи Аьбдуллаев, шариаьт элмурдал доктор, Сириянавасса аьлимчу Мусттапа Диб аль- Буга , Москавуллал ва щалвагу Аьрасатнал Патриархнал викарий, епископ Люберецкий Серафим, Дагъусттаннал ягьудинал ккурандалул хъунама Валерий Дибияев ва цаймигу бусравсса инсантал.
Докладру бувна Ломоносовлул цIанийсса МГУ-лул , дунияллул политикалул факультетрал профессор А. Яковлевлул, диакон Димитрий Асратяннул, Саэд Апаннинал цIанийсса Дагъус­ттаннал теологиялул институтрал ректор Аьбдулла Ацаевлул, Дарбантуллал ягьудинал ккурандалул хъунама Роберт Илишаевлул ва цайминнал. Вайннал докладирттаву гьаз дурсса гьанумур темагу дия диннал ва миллатирттал дянивсса дусшиву ядуван аьркиншивриясса, жагьилтуран экстремизмалул ва терроризмалул идеология къакьамулну дикIан аьркиншиврия­сса. Рамазан АьбдуллатIиповлул кIицI лавгуна форумрал агьамшиву — му диннал дянивсса душивруцIун, хасну жагьилтурансса душиврувугу душиву. «ХIакьину хъунмур никирал инсантурахь кувннащал кув бавкьуну ва нахIуну яхъанан аьркиншиврия буслан бигьар, ми бавкьуну яхъанай ­аьдат хьуну буну тIий, жагьилтал цумур ххуллийх бачинтIий бу­ссарив тIурча, жулва биялалий­сса ишри, ми дусшиврул, хъинбалдарал ва хъиншиврул ххуллийн кIункIу бувансса хъитри жулва бикIан аьркинсса!»- увкуна республикалул БакIчинал. Дагъусттаннал муфтийналгу кIицI лавгунни, дунияллийсса цIанасса тагьаргу хIисавравун ларсун, агьали яхъа­нан аьркиншиву цинярда диннал ва миллатирттал агьулданул хIурмат буну, дуллалисса давурттив ссавурданий дузрайн дуккан дуллай, дакьаву ва аслахIшиву дуруччаву мурадрай.