Ва зурул байбихьулий Лакрал театрданул кIива труппа лавг­ссар районнайн гастроллай «СахIналул усттартал Дагъус­ттаннал агьалинан» тIисса проектращал. Ца труппа, «Чагъанттул чIурду», концертрал программалущал — Лакрал райондалул щархъавун. Цагу – Ккуллал райондалул щархъавун, Курди Закуевлул «Хъявринсса ччаву» тIисса произведениялия Бадави Рамазановлул чивчусса пьесалул премьералущал. Спектакль ккаккан бунни Ваччав, Ккулув, Хъусрахь, Къянив, Вихьлив, 2-мур ЦIувкIрав ва ЦIущарнив.

Зулайхат Тахакьаева
Спектакльдануву ккаккан бувну бур жагьилсса, ккаккан авурсса душнил Бахул бунагь бакъасса бивкIу. Ванин ччай ур цуппагу ччисса жагьил Ибрагьим. Баху ххуй бизлай бур хъуни къатрал хъихъи оьрчI Иллангу. Мискинсса душнин цува сан къаизлазаву хас къабивзун къудурсса Илла ур Баху хъяврин бансса чараннах луглай. Ахиргу дирияй ванахьхьун мукунсса сант. Ибрагьим, революциялул пикрирдал лавсун, дяъвилийн лагай. Шяравусса макручитурал кумаграцIух Иллал Бахун луркIан дуккай.
«Пьесалул ва спектакльданул сакин дурну дур революциялул ва Граждан дяъвилул чIумал Дагъусттаннай хIасул хьусса социал-политикийсса тагьар. Вай иширттавух кка­ккан бувну бур лакрал ца шяраву ялапар хъана­хъисса личIи-личIисса ахIвалданул кулпатирттал кьадарду», — тIий бур театрданул каялувчи Бадрижат МахIаммадхIажиева.
Концертралмур программа уттинин ккаккан дурунни Хьурив, Хъунав, Хъурхъив, Щарав, ГьунчIукьатIув, Карашав, ЧIарав, КIундив.
Цалчинсса гастроллу къуртал хьунни. Чансса бигьагу лавгун, театрданул артистал цIунилгу гьан тIий бур гастроллай. Ва базилух «Хъявринсса» ччаву бишин тIий бур Лакрал райондалул щархъаву, концертрал программа кка­ккан дан тIий бур Ккуллал райондалул щархъаву.