Дагъусттан Республикалул Халкьуннал творчествалул къатлул дуллалисса давурттал Календарьданийн бувну, июльданул 20-нний республикалул Казбековуллал райондалий хьунни цIуллу-сагъшиврул ссуссукьусса оьрчIансса Аьрасатнал халкьуннал аслийсса культуралул центрданийнсса экскурсия.
Бадрижамал Аьлиева
ОьрчIал гъирарай ххал дунни дагъусттанлувтурал хьхьичIра ичIура ишла дуллай бивкIмур: тIахIни-кIичIу, аьрава, янна щащай станок, оьрчI бахIайсса кIану, навтлил чирахъру ва чIярусса цайми-цаймигу затру. Центрданул зузалтрал пишакартурал оьрчIахь бувсунни хьхьичIсса никирттал оьрмулия, багьу-бизулия, канил пишардая.
Укунсса, цаярва хьхьичI ялапар хъанай, ва аьрщарайх зий-занай бивкIсса никирттал канил дугьлай, ишла дуллай бивкIмунищалсса хьунабакьавурттал, щак бакъа, оьрчIаву буттал кIанттухсса, аьзизсса улклуй ялапар хъанахъисса личIи-личIисса миллатирттал инсантурахсса ччаву дихьлахьиссар, му цIакь дуллалиссар, Дагъусттаннал тарихраясса ва культуралиясса кIулшивуртту куртI дуллалиссар.
