Леопард (преднеазиатский) бивкIссар зунттал улклул лишанну. ЖучIава, Ккавкказнаву, цуксса хIайпнугу, ва исвагьисса жанавар, нажагь бакъа, къахьунабакьайссар. Махъва-махъ мунил сурат ларсун дур дукIу интту ТIиларятIиял райондалий.

Леопард лухIисса ттангъри дусса цIиникьрал журалийсса вахIшисса жанаварди. Га лавсун бур Аьрасатнал Федерациялул ЯтIул лу­ттирайн ва мукунма Ухссавнил Ккавкказуллал циняв субъектирдал ЯтIул луттирдайнгу, миннувух — Дагъусттаннал­ссаннуйнгу.
2016 шинал вахIшисса тIа­биаьтравун – Краснодардал улклуйсса Ккавкказуллал заповедникравун итабавкьуну бивкIссар 3 леопард. Аьлимтурал ххал буллай бивкIссар гай цукун къуццу тIий бурив цIусса кIанай, цукун аьдат хъанай бурив вахIшисса тIабиаьтраву. Ххал барча, леопард, цаймигу вахIшисса жанаварт кунма, инсаннаяту лабикIайсса бур. Ми ичIаллил хIайвантрайн авлий къабу­ккайсса бур, шя­равалличIан гъанну бучIар­чагу. Хъиривлаявур­ттайну кIул хьуну бур, хасъсса Центрданий лургъи бувну, вацIравун итабавкьу­сса леопард­ру вахIшину лявхъуминнуяр ссалчIав личIисса ба­къашиву.
Дагъусттаннай цаппара кIанттул инсантал нигьа буслай бур, леопардру гьарза хьувкун, заказникрал лагмасса шяраваллан зараллу биян буллан­ссар тIий. Ми нигьачIавуртту нахIакьданссар тIий бур аьлимтал. Цанчирча хъуннасса федерал заказникрал проект дуллалисса чIумал, экспертътурал хIисавравун лавсъссар кIанттул халкьуннал мурадругу.
Заказникраву къадагъа дурну дур авлий буклан, ядохимикатру ишла буллан. ТIиларятIиял заказник гьарта баврицIун къаралчиталгу гьарзану битантIиссар, тикку аьлимталгу ххишаласса зий бикIантIиссар. Леопардру гьарза хьувкун, зунттал районнай экологиялул туризм ляду­ккаврингу кумаг хьунтIиссар.
Леопардру гьарза баврил программа дузрайн дуккан дуллалиссар Аьрасатнал ТIабиаьтрал луртаннал ва экологиялул министерствалул Сочилул национал паркгу хIала-гьурттуну.

ХIадур бувссар
ХI. Аьдиловлул