Сентябрьданул байбихьулийн МахIачкъалалив «Ак-Гель» микрорайондалий тIитIинтIиссар Совет Союзрал кIийла Виричу А. Николаевлул цIанийсса №59 школа.

З. АьбдурахIманова
804 дуклаки оьрчIансса кIа­ну бусса ва цIусса школалийн занантIиссар ттинин Туралилив­сса школалийн занай бивкIсса, «Ак-Гель», «Пальмира», «Степной», «Газораспределительный станция» тIисса микрорайоннай ялапар хъанахъисса оьрчIру. ЦIусса школалий бувну бур спортзал, мастерской, шадлугъру дувай зал, библиотека ва уттизаманнул лащу-щаллусса класс­ру. Школалул хIаятраву тIурча, спортрал тIуркIурдай бу­ккансса майдан бувну бур.
Шикку нанисса давурттал жаваблувшиву дуллалисса пишакарнал бусаврийну, августрал 20-нин циняр давурттугу къуртал дурну, школалухьхьун дулунтIий бур оьрчIру кьамул бан ихтияр дуллалисса лицензия.
Шагьрулул бакIчинал хIук­мулийн бувну, школалучIан нани­сса ххуллурдацI дурсса чIумуйсса къатри лекьан дурну, асфальт ба­кьлай байбишин най бур. Ххуллу бакьин бантIий бусса бур №35 маршрутка бацIайсса махъра-махъсса «ликказандалучIан» бияннин.