Июльданул 21-нний Да­гъусттаннал паччахI­лугърал технический университетраву «Сириус-Альтаир» тIисса дуккавриву итххявхсса оьрчIансса центрданий гъинттул чIумал оьрчIру бигьалагаврицIун бав­хIусса проектрал сакиншин­дарал цаппара масъалартту ххал бивгьунни.

З. АьбдурахIманова
Ванил кIилчинмур ятIап хьунтIиссар августрал 1-21-ний «Бургъил зума» тIисса оьрчIансса республикалул кIулшивуртту дулайсса ва цIуллу-сагъшиву цIакь дайсса центрданий. Ва ятIапнинрай дарсирдал хIарачат бусса, биологиялул, математикалул, физикалул, журналистикалул ва цаймигу арардаву элмийсса хъиривлаявурттах машхул хьусса 200 дуклаки оьрчI бигьалагантIиссар.
ОьрчIаща бюхъантIиссар 600-ксса мероприятиярттавух гьуртту хьун. Вайннан сакин дувантIиссар элмулуву ва бизнесраву хIарачат бусса вакилтуращалсса хьунабакьавуртту, творчествалул мурцIурду, технолендру, кка­ккан дувантIиссар элмурдая­сса кинорду, интеллектуал журалул тIуркIурду ва квестру, спортрал мероприятияртту ва цаймигу тяхъашивуртту. Вай дачин дурну, оьрчIащал зунтIиссар Москавлиясса ва жула шиччасса 36 педагог, мукунма оьрчIал бакI-магъ дуллай, вайннал ялув авцIуну ДГТУ-рал студентътуравасса 20 куратор икIантIиссар.
БатIаврий вузрал ректор ТIагьир Исмяиловлул, аьмну давурттал сакиншинна цукун най дурив ххал дурну, тавакъю бувунни июльданул 25-ннин циняв масъалартту щаллу бувну, дузал хьун.