ХхюцIаллахъул шиннардил хьхьичIра дурцу­сса ххаллу дур хIакьинусса кьинигу зунттал щархъаву

Уттигъанну ахиратравун лавгсса инсаннах жижара буван чIаххувсса шяравун лавгун унува, ссукIурай щябивкIсса ларзнил чIирттайх нанисса токрал ххаллу янилун дагьайхту, ттун бувчIуна инсантал цанма цивппа «къатIри» бизлай бушиву. Ттул ихтилат, личIи-личIисса багьантту шаврийн бувну, жула зунттаву­сса инсантурал къатрайн цIу дагьлай душивриятур. Ларгсса шинал яруссаннал райондалий щаллусса шяравалу ччурччунни цIу да­гь­ну. ДукIу август зурул ахирданий Ккуллал райондалийн бивчусса чявхълулгу хъунисса зараллу биян бувна жула инсантуран.

ХIажимурад ХIусайнов
ХхюцIалуннива лирчусса шинну ларгун дур жула Ккуллал райондалийн чани бувцуния шиннай. Вана вайксса шиннардил хьхьичIра дурцусса ххаллу дур инсантурал къатраву. Хасъсса зузалтран кIулхьунссар цуми ххаллал цуксса хIаллайсса ток­рал гуж бухIайссарив. Амма гания махъ, хъинну чанну бакъа, пишакарсса электриктурал къадуцлай бур къатравун ххаллу, къатрал залуннал, ванал оьрчIал ччи-ччикун дуцлай бур ми. Туну, яла цIу къадагьну къадикIанссархха. ХIасул хъанай бур «Буссарив ва иширан чаран?» — тIисса суал.
Сайки циняв идарарттал къат­рал чIирттай жунма ххал шай, цIу дагьарчагу ишла бувай­сса, ярагъ бивхьусса «Пожарный щит». Шикку бикIай кIива бад­ра, рикI, кIира огнетушитель, чIатIри, муххал къазихъ ва къундалул бувцIусса ящикI. Вара кьяйдасса «наборду» дикIан бучIия инсантурал къатрал хIаятирттавугу. Ва иширал ялув на ихтилат бувссия Ккуллал райондалул «Пожарный частьрал» каялувчи Къудуев Зайнуллагьлущал.
— Гьарца шяраву бикIан аьркинссар инсантурал бувсса, нажагь цIу дагьарчагу, щин ласун бюхъайсса бяр. ТIайлар, бур шяраваллаву мукунсса бярду. Амма, миккун ххуллурду бувну, машина бацIан бюхъайсса, бетон бувтIусса кIанттурду бувну бакъар. Ва иширал ялув жу чагъарду чичлай буру райондалул бакIчинайн, прокурорнайн ва пожардал ялувсса инспекторнайн. Вай давуртту дуван буржлувссар шяраваллал бакIчитал. Шиккува ялагу ххи буван ччива: цIу дагьни ишла дуван аьркин­сса кьай-кьуй дикIан багьлагьи­ссар администрациялул ца къатлуву дирхьуну. Зий дикIан багьлагьиссар баян баву дуван бю­хъайсса радиорттугу.
Шиккува ххи буван, райондалийсса подстанциялул зузалтрал жаваб дуллай бур инсантурал къатраву дирхьу_сса счетчикирттачIан дияннинми ххаллал. Гания гихуннайминнул жаваб дулун аьркинссар тIар къатрал залуннал. Амма ши­ккугу, ялув кIицI бувсса куццуй, шяраваллаву бакъар, хьхьичIава кунма, багьагу бивхьуну зузисса электриктал. БучIия шикку шяраваллал бакIчитуран, цачIун хьуну, ца пикрилийн бувкIун, Дагъусттаннал токрал хъуниминнайн чагъар чичин, жула райондалиясса Халкьуннал Мажлисравусса депутатъталгу гьуртту хьун бувну.
Учин мукъун, жула шяраваллаву чIяруми къатраву бугьарасса, токращал «дусшиву» да­къасса инсантал яхъанай буссагу жунма кIулли.
Нанияра дуруччиннуча жула къатри цIу дагьаврия.