Гъи цила нирхирайн дагьан ливчIун бур гьантри. МахIач­къалаливгу, гъидайдихьулийн хIадур хъанай, кIичIиртту, паркру, скверду бакьин буллай, цIу буллай булувкьуну бур. Ттинин хъуншагьрулий бувгьуну бур ттуршвахъул мурхьру, азарва­хъул къатIри-тIутIив.

Масалдаран, жунма цинявн­нан ххира хьусса Лениннул комсомолданул парк халкь кьамул бан хIадурну бия майрал байрандалул гьантрайва. Шикку дурну дия хъуни-хъунисса давур­тту. ЦIу бувну, бакьин бувну бия халкь занансса ххуллурду, ур­ттун дургьуну дия газонну, бувну бия авурсса тIутIал клумбарду, зий дия фонтан. Паркраву цIу буккан бувну бур тталлайсса чирахъру, зий дур украсса интернет, мукунма бур шахматирттай буккайсса къатта ва цала чурххал цIуллу-сагъшиврух къайгъулийминнансса, спорт ххираминнан­сса воркаут-майданну ва джунгли-парк. Халкьуннал я ххари буллай дур цIусса арт-объектирдалгу: къюкIлил куццирайсса скамейка, чIимучIали-клумба, мурчай гьарахъалтту ва цаймигу.
Шикку, гьар кьини учирчагу, оьрчIансса тяхъашивуртту, мастер-классру, художествалул кружокру най дур. Ахттакьун бизулуву итадакьайссар хъуниминнансса ххуйсса макьанну. Паркрал зузалтрал бусаврийну, вай тяхъашивуртту нантIиссар гъинтнил бигьалагай кьинирдай.
Бакьин бувну, тIутIал щюллишиврул чIюлу бувну бур Родопский бульваргу. Махъра-махъ дансса давурттив лирчIун дур Кировлул ва Халиловлул сквердавугу. ЧIал къавхьуну сайрданий буккантIисса халкьуннаща бюхъантIиссар шикку дур­сса давурттал кьимат бищун. Масалдаран, генерал Халиловлул цIанийсса сквердануву дирхьуну дур цIусса тренажерду, бувну бур авурсса беседкарду ва мюрщултрансса майданну. Кировлул сквердануву роликирттай, скейтбордай ва гироскутердай занан­сса бахьттагьалтрансса жегъир­ххуллурдугу бувну бур.

ХIадур бувссар З. АьбдурахIмановал