Майрал 30-нний МахIачкъалалив ДР-лул Халкьуннал Мажлисрал миллатирттал дянивсса арардал, жяматийсса иширттал ва диннал цачIуншивурттал комитетрал председатель МахIаммадкьади ХIасановлул каялувшиврулу хьунни «Дагъусттаннал СМИ-рду: культуралул ва тарбиялул каширду» тIисса «ккуркки» стол. МахIаммадкьади ХIасановлул бувсунни «ккуркки стол» буллай бушиву ДР-лул БакIчи Рамазан АьбдуллатIиповлул тапшур баврийну.
Цалчин махъ лавхъунни Дагъусттаннал печатьрал ва информациялул министр Рашид Акавовлул. Ганал бусаврийну, республикалий хIакьину хъуннасса даву дуллай бур СМИ-рдал культуралул ва тарбиялул каширду дузрайн дуккан даврин хасну.
«ХIакьину агьалинал мурадру щаллу буллалисса ва жяматрал ва властьрал дянив дахIаву дуллалисса ца агьамсса ххуллу-ххану хъанахъиссар СМИ-рду, яни кказитру, журналлу телевидение, интернет. Миннул щаллу буллалиссар агьали информациялул, бусласиссар дунияллий хъанахъисса иширттая. СМИ-рдал хъунмасса асар биян буллалиссар культуралийн, хаснува жагьилтурал тIул-тIабиаьтрайн. Масс-медиа хIакьину хъанахъиссар властьрал ва социумрал хIала-гьурттушиврул индикаторну», — увкунни министрнал.
Рашид Акаевлул бувсъсса куццуй, республикалул Печатьрал ва информациялул министерствалул хъуннасса даву дурссар республикалул СМИ-рдал давурттал мюнпат ххишала баврин ва ми Аьрасатнал информациярттал майданнив буккан баврин хасну, ттизаманнул тIалавшиннугу хIисавравун ларсун. СМИ-рдал дуллалисса тарбиялул, культуралул, просветительшиврул давуртту хъиннура аьркин хъанахъиссар Дагъусттаннал чIявумиллатирттал дянив. ХIакьину региондалул СМИ-рдай чIяруну ришлай бур Дагъусттаннал миллатирттал дянив дусшиврул, рувхIанийну гъаншаврил, лагма лагаврил пикри-зикрилул материаллу. Миннуяр ххишалагу, Дагъусттаннал Печатьрал ва информациялул министерствалул каялувшиврулу СМИ-рдай чIявуну буслай бур Дагъусттаннал миллатирттал культурарду кувннивух кув хIала духхаврил, ми ядаврил ва хьхьичIуннай хьун даврил цIаний дуллалисса республикалул давурттаяту. Министрнал мукунма бувсунни республикалул дуккаврил ва просветительшиврул программарттая, литературалия, культуралия ва магьирлугърая.
Дагъусттаннал дуккаврил ва элмулул министрнал хъиривчу ХIажимурад Аьлиевлул бувсунни цIанасса ппурттуву министерствалул хIадур дуллалисса ва дузрайн дуккан дуллалисса дуккаврил проектирдая.
Дагъусттаннал БакIчинал советник Зубайру Зубайруевлул бусаврийну, Дагъусттаннал СМИ-рдал хъинну хъуннасса даву дуллалиссар агьалинал дянив рувхIанийшиврул ва адав-мяърипатрал ххазинарду машгьур баврин хасну. Ванал мукунма кIицI бунни республикалул журналистътурал харжру чансса бушивугу, лавайсса даражалул пишакарталгу бакъашиву редакциярттаву зий. Ганал пикрилий, му масъала щаллу баншиврул, аьркинну бур баххана буван паччахIлугърал ялунбихьуртту ва СМИ-рдан аьркинну бур чялишну зун соцсетирдаву.
«Ккуркки столданий» ихтилат бунни мукунма ДР-лул Халкьуннал Мажлисрал Аппаратрал информациялул ва аналитикалул отделданул хъунама Уллубий Эрбалатовлул, Дагъусттаннал Журналистурал союзрал председатель Аьли Камаловлул ва м.ц.
ХI. Аьдилов
