Циксса маршруткарду жула кучардайх занарчагу, багьлулгу кьювкьусса троллейбусру ва автобусру заназавриягу къулайшинна чIирисса да­къар. Гьарцаннун цила пассажир чанну къаикIай. Цаппара гьантрал хьхьичI шагьрулул ххуллурдая троллейбусру бат шавугу гьарнан хIисав хьухьунссар.Ттунгу мува куццуй. Ттухьва нава бивкIра: «Ягу ччувччусса ттукIрах бурж буну ягу даврил харж къабуллай тIий даврийн къабуклай бикIантIиссар»,- тIий.
З. АьбдурахIманова
Мяйжаннугу, вай гьантрай ашкара хьунни, троллейбусир­ттал управлениялул лахъан аьркинсса бурж сававну, сайки ацIва гьантлийсса троллейбусру занай къабивкIшиву. Троллейбусирттай зузисса щупиртурал, цив даву дакъа цуксса хIаллай бикIантIиссар тIисса авазалущал бувккукун, июньдалул 15-нний хIукуматрал ва ттукIрал идаралул чулухасса вакилтал гьур­ттусса комиссия хьунабавкьунни троллейбусирттал управлениялул коллективращал.
Хъуншагьрулул бакIчинал хъиривчу ХIаким Ашиковлул шикку бувсунни гьашинусса шинах управлениялул ттукIрахсса арцул бурж ба­къашиву, хьхьичIми шиннардий къалавхъсса буржру сававну авара хъанай бушиву. КIицI бувунни ванал мукунма, управление цийнува цуппа дузал хъананшиврул ттигу цаппара цIусса троллейбусру машан ласун багьлай бушиву.
Шагьрулул админист­рация­лучIасса ххуллурдал, транспорт­рал ялувсса къуллугърал хъунама Сяъдуллагь Исмяиловлул бусаврийну, ва шинал ахирданийннин 13 цIусса троллейбус машан ласунсса умудрай бусса бур.
Хьунабакьаврий мукунма хIукму хьунни хIукуматрайн чичин хIадур бувсса чагъарданий ахIвал-хIал кIюласса халкьуннал хIакъиравусса льготардах къулагъас дуван. Троллейбусрай щябикIаврих ласайсса багьа щия ласун багьайсса, къабагьай­с­са бурив цIунилгу ххал бигьин. Ишла бувсса ттукIрахсса буржирал хIакъиравугу гьарца зуруй чан-чанну тIий бурж лахълан­сса кьутIи цIакь дурунни.
Хъиривмур кьинива шагьрулул кIичIирттавух троллейбусру занан бивкIунни.