Июньдалул 27-нний Дагъусттаннал БакIчи Рамазан АьбдуллатIиповлучIа гьар нюжмардий шайсса батIаврий ДР-лул экологиялул ва тIабиаьтрал луртаннал министр Набиюлла Къарачаевлул бувсунни Экологиялул шинан ва Каспийрал шинан хасъсса сакиншиндарал дуллалисса давуртту биттур дуллалаврия.
«Жул пландалий ккаккан дурну дур щинал объектру уттара дуккан даврин, бярдал, неххардил, хIавзирдал, щин ядай кIанттурдал экологиялул тагьар ххуй даврин хасъсса давуртту. ХIакьинусса кьини министерствалул тамансса давуртту дурну дур кьянкьасса цIинцI, лур дагьмур марцI даврин хасну. Ми давурттаясса мюнпат ххишала хьуншиврул жу, хасъсса схемагу хIадур дурну, Аьрасатнал РосприроднадзордануцIун дакьингу дурссар. Му схемалий ккаккан бувну бур циксса буссарив республикалий, ххилучIрурдал кьянкьасса затру салкьи дурну, марцI дуккан дайсса (утилизациялул) полигонну ва заводру. Ми давуртту дуллай байбивхьуссар.
Дагъусттаннал Минприродалун чIалачIиссаксса, ххуйсса ялун бучIантIимур бур портрал даврил. Аьлимтурал тIимунийн бувну, жамирдаща хьунтIий бур бугьлан 80 азардаксса тоннарду килькалул. Гай машай буккан буван захIмат къахьунссар. Министерствалун ччай бур 3 причал цIу буккан буван ва ца причал цIуссагу бан. Портрал дур реконструкциялул проект 912 млн. къурушрансса, мунил хъинчулийсса экспертизагу бувну бур. Экологиялул шинал ва Каспийрал шинал пландалийсса цинярда давуртту биттур дан най буру», — увкунни Набиюлла Къарачаевлул.
Яла мунал бувсунни республикалий бярдаву чавахъру лургъи баврил хIакъиравугу.
Дагъусттаннал БакIчинал министрнайн тапшур бунни лавай кIицI бувсса циняв масъаларттал ялув ацIаву дуван.

ХIадур бувссар ХI. Аьдиловлул