Рашидлул душ Мамаева Шамай
Хъин дуван къашайсса азар ххарарххуну цаппарасса шиннугу дурну, ва мубараксса Рамазан-зурул гьантрай аьпалул хьунни ТтурчIиял шяравасса Рашидлул душ Мамаева Шамай.
Бувну бур Шамай 1932 шинал Лаккуй ТтурчIиял шяраву. Ччясса оьрчIнийва буттацIа хьуну бур ва. ЦIуссалакрал райондалийн ТтурчIиял щар дизан дурну махъ, гикку оьрмулул 12 шинаву байбивхьуну бур Шамайл захIматрал ххуллу, къурнил бригадалуву тIий, фронтран аьркинмур щаллу дуллай, цайми-цайми кIанттурдай тIий.
ЗахIматрал хъунмур ххуллурив Шамайл байбивхьуну бур МахIачкъалаллал балугърал консерварттал комбинатрая, микку личIи-личIисса цехирдаву зий цимигу ацIрахъул шинну дурну дур. Цаппарасса шиннардий зий бивкIун бур МахIачкъалаллал «Дагэлектромаш» заводрай бригадирну-малярну.
Шамай цимилагу лайкь хьуну бур хIурматрал грамотарттан, барчаллагьирттан ва багьлул ларайсса бахшиширттан, «ЗахIматрал ветеран» цIанин. Чув зурчангу, мудангу хIурматрай, бусраврай бивкIссар зузиминнал дянив.
Шамайл оьрмулул дусну хьуну ур Шахьуйннал шяравасса Мамаев ПаттахI. Вайннаща сакин буван бювхъуну бур ТтурчIиял ва Шахьуйннал шяраваллил дянив эбратрансса, хIурматрайсса кулпат. Вайннал, ххаллилсса тарбиягу дуллуну, оьрмулул ххуллурдайн тIайла бацIан бувссар кIия арс ва кIива душ, мукунна хъуннасса гьурттушинна дурссар миннал оьрчIру, оьрчIал оьрчIру тарбия бавривугу.
Шамай цава-цану ххирая ТтурчIиял ва Шахьуйннал жяматирттан, кIирагу шяраву бия мунил хIурмат, бусрав.
Шамай бикIайва лагма-ялттунащал хIал бавкьусса, дакI хъинсса хъамитайпа, мунищала архIал кьянкьасса хасиятрал заллугу. Ванил чаннасса, иминсса симандалия тачIав пиш чан къашайва.
Шамай аьпалул шаврил кьурчIишивугу кIидачIлай, жижара буллай буру арсурваврахь АбутIалиблухь, Рашидлухь, душварахь Маяхь ва Асиятлухь, куявтурахь МихIаммадахь ва Кирамуттиннухь, арснал хъаннихь Земфирахь ва Иринахь, оьрчIал оьрчIахь ва махъсса цинявппагу гъан-маччанахь.
Шамайл рухI хъинний дишиннав, пирдавс-алжан нясив буваннав. Амин.
Шахьуйннал
ва ТтурчIиял жямат
Биригузил ХIажинал душ Супиянова Хамис
Хъун бакъасса хIаллай къашавайгу бивкIун, аьпалухьхьун лавгунни Бархъаллал шяраватусса Биригузил ХIажинал ва Искандархъал Ххадижатлул душ Супиянова Хамис.
Хамис «Илчи» кказитрал редакциялулгу хьхьичIунсса дусъя, чичайссия, буккайссия, ца кказит лях гьан къабивтун, чIявуну бучIайссия редакциялийнгу. ЧIумуя чIумуйн «Илчилий» бищайссия ванил гьунар ххину чивчусса шаммарду, назмурду. Ванил лас Супиянов Аьлибутта Карашрал шяраватуссар. КIивагу жяматрал дянив сийгу, хIурматгу бусса инсан бия Хамис, бювхъусса бия багьу-бизулул, тIул-тIабиаьтрал.
Хамис аьпалул шаврил пашманшивугу кIидачIлай, дакIнийхтунусса жижара буллай буру ванил душварахь, куявтурахь, уссурссуннахь ва махъсса цинявппагу гъан-маччаминнахь. Цил бунагьирттал аьпа баннав, рухI рахIатний дишиннав.
Бархъаллал ва Карашрал
жямат,
«Илчилул» редакция
