Июньдалул 15-нний 12 ссятраву «Первый», «Россия», «Россия – 24» телеканаллал эфирданий, «Маяк», «Вести ФМ» ва «Радио России» радио-станциярттавух дайдирхьунни «Владимир Путиннущалсса тIайланмасса линия» тIисса программа ккаккан дуллай.
Эфир дачин дуван кумаг буллалисса журналистътурал Татьяна Ремезовал ва Дмитрий Борисовлул бувсъсса куццуй, Аьрасатнал Президентнал жавабру дуллай ур билаятрал жяматийсса, политикалул, экономикалул, багьу-бизулул тагьардал, мукунма дунияллул халкьуннал дянивсса тагьарданул хIакъиравусса суаллахьхьун.
ТIайланмасса эфирданул редакциялийн бувкIун бур 1 миллион ва 100 азарва суал телефондалувух, бюхълай бур гьан буван видеосуаллугу.
АцIния кIира кьини хьуну дур суаллу кьамул буллай, кьамул дурну дур 2 миллиондалийн дирсса личIи-личIисса лабизавуртту. Миннувух яла чIяруми дур багьри лахъ шаврил, агьалинал оьрмулул даража буруччаврил, ЖКХ-лул хIакъиравусса.
Цалчинмур суал буллунни Д. Борисовлул:
— Махъсса ппурттуву тамансса гъалгъарду бур жулла экономикалуву хъин чулийсса дахханашивуртту хъанай душиврия. Къуртал хьуссарив экономикалул кризис?
В. Путин: Му суалданухьхьун жаваб дулун аьркинни тIайласса ккаккиярттайн чул бивщуну. Ми ккаккиярттал буслай бур Аьрасатнал экономикалуву рецессия духлаган дурну, лябукку хъанайгума бушиву. МуничIан ялагу зана хьунну, амма цалсса ттун бусан ччай бур захIматсса масъаларттаяту. ЖучIара яларай дагьунни инсантурал доходру махъсса цаппара шиннардий, гьарза хьуну бур мискинну ялапар хъанахъими, яни доходру яхьун шайсса минимумраяр чансса ласайми. Махъсса шиннардий мукунсса тагьарданий бур 13,5 процент инсантурал, жунма аьркинну бур мунил пикри бан.
ЦIана 3 кварталданий жулла экономикалуву лябукку хъанай бур. ВВП лахъ хъанай дур махъсса 3 кварталданий. Лябукку бур промышленностьравугу, гьарза хъанай дур гьанумур капиталдануцIунсса инвестицияртту. ХIакьинусса кьини яла чIиримур инфляция хьуну дур 4,1 процент, мукунсса инфляция уттинин тачIав къархьуссар. Хъунна хъанай дур Централ банкирал мусил луртангу, дукIу дия 368, гьашину дур 405 млрд. доллардал.
Хъиривгу буссар
ХI. Аьдилов
