Июньдалул 12-нний жула щалагу билаятрай дайссар агьамсса паччахIлугърал байран – Аьрасатнал Кьини. Ва хъанахъиссар билаятрал ца яла «жагьилмур» байран.
1990 шинал июньдалул 12-нний РСФСР-данул Халкьуннал депутатътурал цалчинмур съездрай кьамул дурссар Аьрасатнал ПаччахIлугърал суверенитетрал хIакъиравусса декларация. Га декларациялий ккаккан бувну бивкIссар Аьрасатнал Конституция ва законну яла агьаммину хъанахъишиву. Аьрасатнал паччахIлугъ цIакь шаврил ца лишанну хъанахъиссар билаятрал цIусса цIа кьамул даву – Аьрасатнал Федерация (Аьрасат). Гьамин, та чIумал июньдалул 12-нний Аьрасатнал хьуссар цалчинма Президентгу.
Ва кьини щалва билаятрай дайссар шадлугърал мероприятияртту. Яла хъуними шадлугъру шайссар Москавлив, ЯтIул майданнив, ва къуртал шайссар Аьрасатнал Кьинилул савлугъиннансса хъуннасса салют даврийну. Шадлугъру дантIиссар Дагъусттаннал шагьрурдай ва районнайгу.
